Koordînasyonê KJKyî bi wesîleya 21ê Adare Roşanê Newroze mesajêk weşana û semedê pîlkerdişê mucadeleyî veng da.

KJKyî sere de Nerewroze pîroz kerd, Rayberê Şarê Kurdî Abdullah Ocalan selam kerd û şexsê Mazlûm Dogan, Zekîye, Rahşane, Ronahî-Bêrîvane, Sema Yuce, Fikrî Baygeldî, Sara- Sakîne Cansiz, Zîn Cîzre û Leyla Agirî de şehîdê azadîye yad kerdî.

Eşkerayîya KJKyî ra qismêk wina yo:

''Dewleta çete ya Erdogan Bahçelîyî seba ke ters, dizdîye û karanê xo yê leyminan binimo hêrişan de sînor nas nêkena. Îqtîdaro ke hêrişê her tewir vera nasnameyê cinîyan û şarê ma keno nika zî vera Rayberîya tay xeberê bitehluke eştê werte ke raştîya înan nîna zanayene. Tewr peyên de pê serkewtişê Garê rûtîya kralî vejîyaye werte.  Seba ke xoverdayîş şarê ma bişiknê û binkewtişê xo  binimnê polîtîkaya qirkerdişî ya vara Kurdîstanî xorîyêr kerda. Pê rojdemê qefilnayîşê HDPyî cehd kenê ke têna seba kurdan nê warê sîyasetê şaranê demokratîkan ê Tirkîya zî werte ra wedarinê. Çeteyê ke qirkerdişê vera kurdan kerdî armancê xo Deheqan ra wetêr ê.  Newroza 2021î  ganî bibo wesîleya qedînayîşê zulmênê çeteyan ke Dehaqî xo dima verdayî.

Ganî ma hêzê xo rêxistinkerde bişuxulnenê û sere de sîstemê Îmraliyî vera zulmê vera kurdan hersê xo biaçarnê çalakîyan. Ma Newroze de vejîyê waran semedê azadîya Rayber Apoyî mucadeleyî pîl bikerê û heta serkewtişî sey tewirê cuye, sey nefes girewtiş-dayîşî mucadeleyî rê dewam bikerê. Ma pê bawer ê ke şarê ma pê mîsyonê tarîxî têbigêro û sey laserî şiro faşîzmî ser.  Çakuço ke Kawayî da sereyê zaliman ro na Newroze do cinîyî bikirişê.

Berpirsîyarê sîstemê vera Rayberîya ma têna dewleta tirke ya faşîste nîya.  Mîmarê sîstemê îmraliyî komplokerê mîyanneteweyî yê. Nê hêzê senî ke sîtemê îşkenceyî ra berpirsîyar ê, na rewşe ra zî ê berpirsîyar ê.  Eke ê nêwazenê nayî ra berpirsîyar bê ganî mudaxeleyê dewleta tirke bikerê.

Mucadeleyo ke Rayber Apoyî dayo destpêkerdene nêzdê pancas serran o ke pê pîlbîyayîş dewam keno. Tîje rindîye, cesaret, germîye, safîye, pakîye û anorê roşnayîye ya.  Xirabîye pê germîya xo vêşnena, rîyê dinya cuya rê akena, ewrenî pê heskerdiş û şayîye verar kena.  Ma Newroze emserî pê fehmkerdiş û verarkerdişê tîje pîroz bikerê.

Ma îradeyê mucadeleyî ke cinîyan û şaranê bindestan keno azad vejê werte û pê çakuçê Kawayî zulmê zalîmî lete leware bikerê. Ma bibê adir û zulmê bivêşnê, ma bibê bahoz û kelaya Dehaqan birijnê, pê ercê anor û azadîye zerrîya xo tîje dir bêrê têhet. Ma rîyê erdî pê rindîya cinîyan newe ra tacîdar bikerê û xo newe ra biafernê. Bi na wesîle ma veng danê ke sere de cinîyî heme şarê ma, şarî, hetê demokratîkî , azadîwaştoxî wa bi qerardarîya 'Heta ke kelaya faşîzmî nêrdijîyo cuya mi rê herem o' mucadele bikerê.

Pê nê îradeyî ma sere de Rayber Apo, şexsê cinîyan  ê kurdan de Newroze şarê ma, şaran, heme hemraynê xo pîroz kenê û şehîdê ma yê ke Newroze kerde wayîrê nasnameyî bihurmet û mînetî yad kenê û vanê ke wexto ci yo ke ma dormeyê Rayber Apoyî de bibê mertal, sîstemê Îmraliyî bişiknê û camêrdê zalîmî rê bidê vînîkerdene.''