Koordînasyonê KJKyî bi eşkerayîya nuştekîye veng da ke wa vera polîtîkaya qeyûmî her kes bi ruhê serhildanî wirzo payan ser.

Eşkerayîya KJKyî de ca dîya nînan: ''Rejîmo faşîst ê AKP-MHpyî des serranê peyênan de çarçewaya Planê Çokdayîşî yê vera şarê kurdî de qirkerdişê fîzîkî, kulturkî û sosyalî keno. Sey leyteyêkê nê planî bi qeyûman heqê sîyasetî yê şarê kurdî xesp kenê, destnêpadayîşê wekîlan wedaritî dest nayî dezgehanê polîtîk û komelê sîvîlî yê şarê kurdî û cinîyan ser. Vatişê xespkerdişê îradeyî û darbe pênasêko kêm o. No qirkerdişo sîyasî yo. La şarê ma û cinîyan weçînayîşê 31ê adare de planê çokdayîşî betal kerd, hem zî sîyasetê qeyûmî bi hewayêkê tarîxîyî bin fîna.  Rejîmê faşîstî yê AKP-MHPyî ke roja bîne ya weçînayîşî de Şaredarîya Wanî de qeyûm ca kerd, netîceya serhildanê pîlî yê Wanî û têkoşînê hemparî yê hêzanê demokratîkî de peyser game eşte. La îradeyê şarê Şirnexî bi tewirê îstîlayê neweyî ame xespkerdene û Hîlvan de bi vêşnayîşê sindoqan rayê şarê ma nêameyî hesibnayene.

Bado ke AKP weçînayîş de binkewt û bi xoverdayîşê Wanî têkoşîno hempar ê hêzanê demokratîkî vejîya werte, rejîmê faşîstî sîyasetê 'normalbîyayîşî' fîna dewre, Dewaya Kobanê de cezayê giranî dayî sîyasetmedaranê kurdan , genaralê dewaya Ergenekonî veradayî, Rojawan de bi bahaneyê weçînayîşan hêrişî dayî destpêkerdene, vera Başûrê Kurdîstanî û Herêmanê Pawitişî yê Medya planê operasyonê leşkerî fînayî dewre. Rejîmê faşîstî  sîyasetê xo yê 'Tirkîya de normalbîyayîş, Kurdîstan de qirkerdiş' ewro Şaredarîya Colemêrgî de bi cakerdişê qeyûmî da destpêkerdene. Wa heme şarê kurdî bizano ke rejîmo qirker û faşîst ê AKP-MHPyî vera heme kurdan planê dişmenîye û qirkerdişî rayra beno.

Sere de CHP ma veng danê heme hêzanê muxaletî yê Tirkîya: Prosesê 'normalbîyayîşî' qirkerdişê kurdan ke ameyo destpêkerdene, vera ci bêveng memanê.  Eke şima bêveng bimanê şima zî benê şîrikê qirkerdişê kurdan. Coka ganî her kes vera sîyasetê qeyûmî û mudaxalekerdişê weçînayîşê Rojawanî vengê xo vejo. Ya şarê kurdî reyde çarçewaya yewîya demokratîke de têhetameyîşo tarîxî yeno kerdene ,ya zî hukmo tarîxî yê şarê kurdî do ser bikewo. Ma veng danê şarê xo û cinîyan ke wa vera xespkerdişê îradeyê vengê xo berz bikerê. Ma veng danê şarê Colemêrgî û şarê Kurdîstanî, cinîyan û hêzanê demokratîkî ke wa bi ruhê serhildanî wirzo payan ser û planê qirkerdişî yê rejîmê faşîstî yê AKP-MHPyî betal bikero. Qet çew nêeşkeno heqê  şarê kurdî yê bewlîkerdiş û wayîrvejîyayîşê qederê ci  xesp bikero.''