Koordînasyonê Komalanê Cinîyan ê Kurdîstanî (KJK) bi wesîleya serrgêra şehadetê ronayoxanê PKKyî ra Sakîne Cansiz, Temsîlkara KNKyî ya Parisî Fîdane Dogan û Endamê Têgêrayîşê Ciwanan Leyla Şaylemez mesajêk weşana.

Mesajê KJKyî wina yo:

''Ma serrgêra 9. de yê ke kadroya raybere ya PKKyî Sakîne Cansiz, Temsîlkara KNKyî ya Parisî Fîdane Dogan û Endamê Têgêrayîşê Ciwanan Leyla Şaylemez hetê MÎTê tirkan ra bi fermanê şefê faşîstî yê AKPyî Tayyîp Erdoganî 9ê çeleyê 2013î de Paris de ameyî şehîdkerdene.

Hîkayeya cuya embaze Sakîne Cansiz heman wextî de tarîxê cinîyan ê kurdan o. Her hela cuya Sakîne Cansiz waştişê azadîye yo. Cuya ci seba nê waştişê azadîye ameye pêşkêşkerdene. Aye qalibê cuye yê sîstemê kapîtalîstî, tradîsyonê ke cinîyî kerdêne kole bi çêrî dirnayî, zîndanê tarî yê 12ê Êlule roşnî kerdî. Embaze Sakîne pê tewirê xo, beşdarîya xo bîye çimeyê îlhamî yê şar û têgêrayîşê ma û cinîya kurde temsîl kerde. A cuya xo de tim bîye şerwanêka azadîye. Aye tim bêteredut rayberîya têkoşînê şarê ma kerde, ma rê mojna ke ganî cinîyî senî azad bibê. A bîye mîsala ma. Nê esasî ser o ma şexsê Sakîne Cansiz, Fîdane Dogan û Leyla Şaylemez de pêro cinîyan ê şehîdan bi minet, heskerdiş û rêzî yad kenê. Cinîyan ê şehîdan peyê xo de mîrasê azadîye û xoverdayîş verda. Ma do bibê layîqê vîrameyîşê înan. Ma do qetî ser bikewê.

Nê qirkerdişê gemarinî de ke Paris de qewimîya rîyo raştikên ê Almanya û Fransa vejîya werte. Rixmo ke 9 serrî vîyartî hema zî no qirkerdiş nêame roşnîkerdene. No sûcêko pîl o û yeno a mana ke yeno waştene ke qirkerdiş mîyanê tarîtîye de bimano. Nê dewletanê ke xo sey averwazî vînenê seba ke mesuldarê nê qirkerdişî ceza megêrê huqûq û edalet binpay kerdê. Bi nê hawayî înan mojna ke ê senî nêzdîyê têgêrayîşê kurdan û cinîyan benê. Qirkerdişê Parisî ra têna dewleta tirke nê sere de Almanya û Fransa sîstemê modernîteya kapîtalîzmî zî mesuldar o. Coka ma înan reyde Almanya û Fransa zî şermezar kenê.

Xeta azadîye û erjan a ke Sakîne Cansiz, Fîdane Dogan û Leyla Şaylemez temsîl kerdêne global a. Înan armanc kerdêne ke seba cinîyan û merdimîye cuya azad û têdûşte biafirnê. Şexsê nê embazanê ma de azadîya şaran, cinîyanê dinya ameya hedefkerdene.

Ma sey cinîyan ê kurdan îdeolojîya azadîya Serek Apoyî de aver şîyî. Ronayîşê PKKyî ra nata ma tewr vernîya xoverdayîş û têkoşînî de ca girewt. Têgêrayîşê ma yê azadîya cinîyan o ke pê Sakîne Cansiz dest pêkerdo, ewro esasê partîbîyayîş, artêşbîyayîşê cinîyan de konfederalîzmê cinîyan ê demokratîkan aver berd. Ma pê Şorişê Rojawanî şorişê cinîyan anê ca û rayberîya şorişê cinîyan kenê. Ma pê xebatanê xo bîyê çimeyê îlhamî yê têgêrayîşê cinîyan ê dinya. Coka dewleta tirke ya faşîste pê paştdayîşê Amerîka û Ewropa vera têgêrayîşê ma yê cinîyan bi hawayêkê sîstematîkî û plankerdeyî hêrişan kena.

Hişmendîya ke Sakîne Cansiz, Fîdane Dogan û Leyla Şaylemez qetil kerdê paştî daya DAÎŞî, pê DAÎŞî cinîyî qir kerdî û qir kenê. Na hişmendîya mesuldara qirkerdiş, tecawuz û remnayîşê vera cinîyanê Efrîn û Şingalî ya. Vakurê Kurdîstanî de zî bi serran o cinîyî yenê hedefkerdene. 4ê çeleyê 2016î de şexsê Sêvê Demîr, Pakîze Nayir û Fatma Uyar de pê qirkerdişî cewab dîya xoverdayîşê cinîyan û mesajê 'Eke şima xo ver bidê do bêrê qirkerdene' ame dayene. Rixmê ney zî cinîyan xoverdayîş, têkoşîn û îsyanî rê dewam kerd. Ewro zî qirkerdişê cinîyan dewam keno. Ewro zîndanan de vera cinîyan ê kurdan her rohe îşkence û caardişê taybetî zêdîyenê. Netîceya nê caardişan de 9ê kanûna 2021î de Garîbe Gezer ameye qetilkerdene.

Rojawan de 2019 de Hevrîne Xelef, 2020 de Leyla Agirî, 2021 de Hesekê ke Hînde û Sena û reyna Kobanê de 3 cinîyê rayberî Vîyane, Nûjîyane û Rojîne ameyî qetilkerdene. Ma nê şehîdanê xo zî bi rêzdarî yad kenê. Pêro şehîdê ma, armanc û cuyê înan çimeyê ma yê hêzî yê. Nê pêro mojnenê ke têgêrayîşê cinîyan ê kurdan û rayberê ci hedefê dewleta tirke de yê.

Dewleta tirke pê nê qirkerdişî xîret kerd ke şarê ma û cinîyan ê xoverdayoxan rê mesajê tarîxî û rojaneyî bida. Seke zanîyeno dewleta tirke Vakurê Kurdîstanî de pê Terteleyê Dêrsimî xîret kerd ke meseleya kurdan biqedîna. Têgêrayîşê PKKyî nê planî pûç kerdî. Mîyanê nê têgêrayîşî de raştîya cinîya kurde ya aktîfe û yê şarêkî vejîyaye werte. Embaze Sakîne Cansiz pê azadîya şarê ma, cinîyan û merdimîye bawer kerd. Sakîne Cansiz û cinîya rayberî yê bînî cokka ameyî hedefkerdene. Bi hezaran cinîyê aktîfî erzîyayî zîndanî, bi seyan gerîlayê cinîyî ameyî şehîdkerdene, vera cinîyan ê kurdan sey tecawuz, fuhuşî polîtîkayê şerê taybetî ameyî caardene. Dewleta tirke pê nê polîtîkayanê bêwijdan, bêexlaq, wehşî û gemarinan şexsê cinîyan ê kurdan de dewaya azadîya cinîyan kerde hedef. Ewro cinîyê kurdî pê Şorişê Rojawanî Rojhelatê Mîyanênî û dinya de rayberîya têgêrayîşê azadîya cinîyan kenê. Polîtîkayê dişmenîya cinîyan ê îqtîdarê AKP-MHPyî xeta azadîya cinîyanê dinya kenê hedef.

Rixmo ke sîstemê kapîtalîstê modernîstî hetê ekonomîk, sîyasî, leşkerî ra paştî dano îqtîdarê faşîstî yê AKP-MHPyî sere de gerîlayê YJA-Starî û xoverdayoxê cinîyî yê zîndanan dadîyê ma, cinîyê ciwanî her ca de tim mîyanê xoverdayîşî de bîyî. Ma nê esasî ser o wayîrê pêro şehîdanê xo vejîyayî. Embaze Sakîne Cansiz raybera têgêrayîşê cinîyan ê kurdan a. Ma pê hîsê qesasî dekerde yê. Ma seba ke na dewa mîyanê tarîtîye de menda hêrsbîyaye ya. Ewropa de cinîyê kurdî, dostê ma seba ke na dewa bêra roşnîkerdene, kiştoxî ceza bigêrê tim xîret kenê.

Dinya, Rojhelatê Mîyanênî û Kurdîstan de her roje sempatî, eleqe û beşdarîya seba têkoşînê azadîya cinîyan benê pîlêr û zêdîyenê. Qelsîya sîstemê kapîtalîzmê modernîstî têkoşînê azadîya cinîyan o. Ma dostanê xo reyde seserra 21. de nê sîstemî ra qesasê xo gênê. Ma sey têgêrayîşê azadîya cinîyan, têgêrayîşê vera sîstemî, xoverdayîşê seba têdûştîye her roje cuye newe ra afernenê.

Waştişê ma yê seba azadîye, rikê ma pîl ê. Cinîyan ê kurdan vera xo da azadîye, serkewtişî. Qet yew hêz nêeşkeno verê azadîya cinîyan de vindero. Ma zî do sey Sakîne Cansizan tim mîyanê xoverdayîşî de bibê û cuya azade û rûmetêne cinîyanê pêro şaran reyde pê têkoşînî do dest bivisnê. Serkewtiş do bibo ê cinîyanê ke seba azadîye xo ver danê.''