Koordînasyonê KJKyî bi wesîleya 25ê Teşrîna Peyêne Roja Têkoşînê Vera Şîdetê Serê Cinîyan eşkerayîyêke daye.

Eşkerayîye wina ya:

''Nê wextî de ke ma hê 25ê Teşrîna Peyêne pêşwazî kenê vînenê ke têkoşînê vera şîdetê serê cinîyan tarîx de reya verêne hende pîl o. Her hetê dinya ra cinîyî semedo ke vera şîdetê camêrdan vajê 'vindere' cepheyê xoverdayîşî de ca gênê. Kurdîstanî ra heta Afganîstan, Misir, Peru, Îngilîstan, Etîyopya û Amerîka ra heta Avusturalya her rengî û serrî ra bi mîlyonan cinîyî vera sîstemê pederşahîye îsyan de yê. Ma sey KJKyî pêro awanîyanê xo yê rêxistinbîyayeyan ê çar parçeyanê Kurdîstanî û teberê welatî selam kenê ke tewrê Hemleya 'Vera qirkerdişê cinîyan wext wextê pawitişê cinîya azade û komelê azadî yo' bîyê. Sey tay herêmanê Rojawanî cayê ke tede şorişê cinîyan berz bîyo Afganîstan de zî îqtîdar bi heman hawayî teslîmê Talîbanî ame kerdene. Ma wayanê xo yê afganan ê bêtersanê ke vera Talîbanî xo ver danê, pê paştdayîşî selam kenê. Selam bo têkoşînê xopawitişê cinîyan ke vera şîdetê camêrdan sînoran ra derbaz bîyo! Selam bo têgêrayîşê şorişê cinîyan ke seserra 21. de vera kolonyalîzm, îşxal û faşîzmî têkoşînê demokrasî û azadîye keno.

Bi wesîleya 25ê Teşrîna Peyêne ma pêro cinîyan ê xoverdayoxanê ke netîceya şîdetê dewlet-camêrdî de dinyaya xo bedilnaye yad kenê. Fermandara YPJyî Sosine Bîrhat ra heta Fermandara gerîlayanê Fîlîpînan Ella, Denîze Poyraz ra heta aktîvîsta cinîya afgane Frozane Safî, Îzabela digane ya polone ra heta Sarahe Everarda îngilîze ma pêro cinîyanê ke hetê şîdetê camêrd-dewlete ra qetil bîyê yad kenê û bi şîarê 'Cinîye, Cuye, Azadîye' û NiUnaMenos (Ma ra yewa bîne do destî ra nêşora' soz danê ke heta cuya azade bêmabên têkoşîn bikerê.

Nameyê Têgêrayîşê Azadîye yê Cinîyan ê Kurdîstanî ser o ma Rayberê xo Abdullah Ocalanî selam kenê ke netîceya Komployê Mîyanneteweyî de esîr bi û 22 serrî yo bi hawayêkê giranî tecrîdkerde yo. Ma sîstemê îşkenceyî û esîrkerdişî yê NATOyî yo ke vera Rayberîye yeno ferzkerdene lanet kenê. Rayber Apo afernayoxê Şorişê Azadîya Cinîyan ê Kurdîstanî yo ke ewro pêro dinya tira îstîfade kenê. Coka sey têgêrayîşê cinîyan ma rijnayîşê sîstemê îşkenceyî û tecrîdî yê Îmraliyî sey têkoşînê bingeyî vînenê û venga pêro cinîyan danê ke dêsanê zîndanê Îmraliyî birijnê.

Embaz û cinîyê ercîyayeyî;

Sîstemê serdestîya camêrdan semedê şiknayîşê xoverdayîşê cinîyan mîyanê sîstemêkê dişmenî de yo. Sîstemê pederşahîye hetêkî ra bi faşîzm-dînperestî-kapîtalîzmî semedê çinkerdişê destkewteyanê têkoşînê cinîyan têgêreno hetêkê bînî ra zî camêrdê nê sîstemî her wextî ra zêdêr pê gonîwerdişî şîdetê fîzîkî, psîkolojîkî cinîyan rê kenê. Hûmara zafê cinîyan netîceya nê şîdetî de şer û koçberîye de têrî manenê û na hûmara vera zêdîyena. Sîstemê serdestîya camêrdan hişmendî, îrade û rêxistinîya cinîyan xo rê sey gefî vîneno û semedê çinkerdişê ney xîret keno ke şexsê cinîyan de pêro komelî kole bikero.

Cinîyî vera raştîyêka winasêne têkoşînê azadîye kenê pîl. Cinîyî pê îrade, îdîa, hêvî û bawerîyêka pîle vera sîstemê serdestîya camêrdan, dewlete, faşîzmî, kolonyalîzmî, kapîtalîzm û îqtîdarîye xo rêxistin kenê û xo ver danê. Vera polîtîkayanê nê sîstemî cinîyî xo zêdînenê, têkoşînê xo global kenê û pelanê neweyan ê serwedaritişî akenê. Vera şîdetê camêrdan, vera şîdetê cînsîperestî, vera qirkerdişê cinîyan, vera polîtîlkayanê kontrolkerdişê bedenê cinîyan, têkoşînî hînî têna merkezan de nê her ca de yeno kerdene. Sey nameyo ke wayanê Mîrabelan da ci ke mana daya 25ê Teşrîna Peyêne têkoşînê cinîyan pê tesîrê perperikî sînoran ra derbaz beno. Ruhê şorişê cinîyan o ke Rojawanî ra pêro dinya rê vila bîyo, Şilî ra bi hişmendîya 'kêmasî mi ra nîya, oyo tecawuzker ti yî' veng vejeno û Agfanîstan de pê şîarê xopawitişê cinîyan va beno.

Ney reyde ma vînenê ke têkoşînê cinîyan têna sey têkoşînê heqanê cinîyan nêmaneno heman wextî de rayberîya têkoşînê edalet, ekolojîk, demokrasî û azadîya komelî keno. Xoverdayîşê komelî zêdêr bi nê hawayî cinîyî xemilnenê. No zî mojneno ke dewro nikayên dewrê cinîyan o. Ye no waştene ke verê dewrê şorişê cinîyan wa bêro girewtene, rayberîya cinîyan bêra astengkerdene. Sîstemê îqtîdarê camêrdan her hetî ra nê sebebî ra hêriş keno.

Hetê bînî ra bi taybetî hêriş vera cinîyanê rayberan yenê kerdene, bi nê hawayî yeno waştene ke têkoşînê cinîyan û xoverdayîşê komelî bêrayber bimanê. Sey Sakîne Cansiz, Leyla Agirî, Hevrîne Xelef û Zara Alvarez Kobanê ra heta Pakistanî, Kolombîya ra heta Filîpînî cinîyê şorişgêrî bi sîstematîkî yenê qetilkerdene. Cinîyê ke vera sîstemî wurzenê payan ser erzîyenê zîndanan, îşkenceyê înan yeno kerdene, mîyanê dêsan de yenê mehkumkerdene û yenê bêvengkerdene. Her roje bi desan, bi seyan cinîyî semedo ke vera koletîye sere wedarnenê hetê camêrdan ra yenê qetilkerdene, bi nê hawayî vera qerardarîya cuya azade qirkerdiş yeno caardene. Her hele de ke ma raştê tacîz, tecawuzî yenê, şîdetê vera cinîyan asta epîdemî de vila bîyo.

Hêrişê hişmendîya sîstemê serdestîya camêrdan û sîstemê vera cinîyan tay hetan ra cîya û tay hetan ra zî seyci yê. Nameyê cinîyanê Kurdîstanî ser o ma sîstemê xo yê xoserî asta şorişê cinîyan de rêxistin kenê la heman wextî de polîtîkayanê hêrişî yê hîrayan de têrî manenê. Faşîzmê dewleta tirke yê bi serkêşîya AKP-MHPyî seba tasfîyekerdişê şorişê ma hêrişê cinîyan ê rayberan keno. Bi sîstematîkî pê kiştoxanê kîrakerdeyan û teyarayanê çekdaran cinîyan ê rayberab qetil kena. Sîyasetmedarê ma yê cinîyî yê rayberî erzîyenê zîndanan û xîret yeno kerdene ke îradeyê înan bişikîyo. Pê kerdişanê şerê taybetî zî xîret kena ke cinîyan teslîm bigêra, pê koçkerdişî xîret kena şarê ma erdê ci ra dûrî bifîna, Kurdîstanî bêmerdiman war verda, pê îşxalê Rojawan û Başûrî seke DAÎŞî Şingal de vera cinîyan kerd xîret kena cinîyanê kurdan kole bikera.

Sey KJKyî ma pê pîlkerdişê rêxistinîya xo, pê pîlkerdişê têkoşînê xo û pê averberdişê xoverdayîşê xo cewab danê nê polîtîkayanê gemarinan ê dewleta tirke ya faşîste û hemkaranê ci. Ma pê hemleya xo ya 'Vera qirkerdişê cinîyan wext wextê pawitişê cinîya azade û komelê azadî yo' ma xoverdayîşî rêxistin kenê ke hêrişanê qirkerdişî pûç bikerê û peynîyaz faşîzmî bîyarê ke rejîmê dişmenê cinîyan o. Nameyê KJKyî ser o ma venga cinîyanê Kurdîstanî danê ke dormeyê hemleya ma de bêrê yewca û vera hêrişanê camêrd-dewlete tewrê têkoşînê ma bibê û bi nê hawayî cewabê xo bidê. Bi taybetî bi wesîleya 25ê Teşrîna Peyêne ma benha cinîyan ê kurdan ê Kurdîstanî û teberê welatî danê le pê çalakîyanê bitesîran vera sîstemê qirkerî tewirêkê xurtî bimojnê, pêlê xoverdayîşî pîl bikerê. Bi 25ê Teşrîna Peyêne ma do bieşkê hemleya xo safhaya diyîne de berzêr bikerê û zêdêr bitesîr bê. La sey Têgêrayîşê Azadîya Cinîyan ê Kurdîstanî têkoşînê ma têna bi ney sînorkerde nîyo. Ma têna vera tedayan rêxistin nêbenê. Ma seba azadîye, cuya azade, azadkerdişê cuye yan zî seba şorişê cinîyan ma xo rêxistin kenê, têkoşîn kenê û xo ver danê.

Cinîyê têkoşêrî;

Ma hol zanenê ke pederşahîye hêzê xo sîstembîyayîşî, vilabîyayîşê hişmendîya xo, modernîteya kapîtalîste ra gêna. O çax ganî têkoşînê azadîya cinîyan zî hêzê xo hişmendîya azade, sîstemê konfederalî yê cinîyan, modernîteya demokratîke ra bigêro. Hem sey têgêrayîşê cinîyan ê dinya asta ma ya nikayêne ya xoverdyîşî hem zî vera hêrişanê sîstemê camêrdîye bi wesîleya 25ê Teşrîna Peyêne xususê bingeyê ke ma ganî biercnê wina yê: Sey cinîyanê dinya nika ra pey ma do xo senî rêxistin bikerê? Ganî ma tecrubeyanê xo, hişmendî, aqîl, perspektîf, formanê têkoşînî, dînamîk, xeyal, mîras, qerardarîya xo bikerê yew û prosesêkê neweyî bidê destpêkerdene.

Ma wextê winasênî de ke hem dewr dewrêko faşîst o hem zî îmkanê caardişê şorişê cinîyan her wextî ra berzêr ê. Ganî ma têkoşînê xo aver berê û gamêka newîye bierzê. Na hemle zî asta dinya de ganî rêxistinîya têkoşînê cinîyan a vera pederşahîye, kolonyalîzm, faşîzm, nîjadperestîye û kapîtalîzmî, hem zî hetê hişmendî û çalakîye ra berz bikera. Na game têna têkilî û koordînasyonê mabênê têgêrayîş û têkoşşînê cinîyan ê herêman nêbo. Sîstemêko newe yê cinîyan hewce yo. Têkoşînê azadîya cinîyan hetê rêxistinî û îdeolojîkî ra pê hêzê xo yê sîstemê xoserî eşkeno sîstemê serdestîya camêrdan çin bikero. Armanc şorişê cinîyan o winasên o. Armancê ma têna qelskerdişê sîstemê camêrdan nîyo. Wext ameyo ke peynîya nê sîstemî bêra. Wext wextê azadîye yo. Coka ma vanê ke wext wextê ci yo ke her cayê dinya de têkoşîno şorişgêr ê cinîyan bêro rêxistinkerdene û pîlkerdene.

Sîstemê cinîyan o ke asta globale de eşkeno şorişê cinîyan rêxistin bikero, ma bi nameyê Konfederalîzmê Demokratîkî yê Cinîyan ê Dinya pênase kenê. Ma pê bawer ê ke paştîya nê sîstemê xo bidê hemsengîya optîmale, herêmî û xosere, xopawitişê destkewteyanê cinîyan pîk bikerê, destkewteyanê neweyan bivisnê destî û bi nê hawayî cuya azade awan bikerê.Konfederalîzmo demokratîk seba seserra 21. do bibo dewrê azadîya cinîyan, eşkeno bibo cewabê persanê sîstemê cinîyan. Ma pê ney bawer ê. Sey KJKyî ma venga cinîyan ê cigêrayoxanê azadîye, awanîyanê rêxistinîyei têgêrayîş û rêxistinanê cinîyan ê dinya danê ke nê sîstemê têkoşînê caardişê dewrê şorişê cinîyan pîya awan bikerê. Ma Konfederalîzmê Demokratîkî awan bikerê û verê pêro hêrişan bigêrê. Seba qedînayîşê şîdetê vera cinîyan, vera hişmendîya serdestîya camêrdan ma têkoşîn bikerê. Vera pêro polîtîkayanê dişmenî ma têkoşînê rêxistinbîyayeyî pîl bikerê. Vera hêrişan ma xopawitişê xo xurt bikerê. Vera sîstemê pederşahîye yê 5 hezar serrî ma sîstemê konfederalî yê cinîyan awan bikerê. Ma hînî vajê ke wext wextê cinîyan o, wextê şorişî yo, wextê azadîye yo.''