Komîteya Perwerdeyî ya KJKyî derheqê Roja Ziwanê Dayîke ya Dinya ya 21ê Sibate de eşkerayîye daye. Eşkerayîye wina ya:

''Bi wesîleya Roja Ziwanê Dayîke ma ê kesanê ke çar parçeyanê Kurdîstanî de û teberê welatî de seba ke kurdkî biba ziwanê perwerdeyî têkoşîn kenê, kede danê, wayîrê ziwanê xo vejîyenê û tewrê aktîvîteyan benê bi rêzdarî selam kenê, ma înan nê tewirê rûmetênî ra fîraz kenê. 21ê Sibate Roja Ziwanê Dayîke îfade kena ke vera sîstemê îqtîdaranê neteweperweran, şovenîstan û tekperestan ziwanêk nêno înkarkerdene.

21ê Sibate Roja Ziwanê Dayîke a raşte Roja Têgêrayîşê Ziwanê Dayîke ya. Na roje netîceya têkoşînê seba ziwanê dayîke yê Bangladeşî de ameye destvistene. Bi na wesîle ma wendekaranê Banladeşî yê ke pêkewtişan de merdî yad kenê. Rixmo ke UNESCOyî na roje sey Roja Ziwanê Dayîke qebul kerda, goreyê Atlasê Ziwananê Binê Tehlukeyî yê UNESCOyî Tirkîya de 20 ziwanan ra 18 hebî rew ra ameyê çinkerdene yan zî çinbîyayîşî de têrî yê. UNESCO ganî endama xo Tirkîya de seba ke polîtîkayê astengdar, tedakarî yê vera ziwan, kultur û xebatanê çapemenîye biqedê mesuldarîya xo bîyaro ca.

Ma venga UNESCOyî danê ke seba ke Tirkîya û welatê bînî peymananê ci bîyarê ca wa teda bikero û seba ke neteweyê bindestî yê sey kurdan bibê wayîrê statuyê sîyasî bixebitê. Îqtîdaro faşîst ê Tirkîya ewro vera kurdkî qirkerdişê xo rê dewam keno. Îqtîdarî kurdkî sey dersa weçinîte pêşkêş kerde la no nêno a mana ke polîtîkaya qirkerdişî ya vera kurdkî qedînaya. Çunke hema zî endamê çapemenîya kurdkî tepişîyenê, dezgeh û organê çapemenîye yê kurdkî maruzê teda û qefilnayîşan benê.

Tedayanê rejîmê Îranî ra zî Rojhelat de kurdkî perwerdeyê bi ziwanê dayîke ra mehrum benê. Îran de mamostaya kurdkî Zara Muhammedî rê hewteyêkî verî cezaya zîndanî ya 5 serran dîyaye. Eşkera yo ke şexsê Zara Muhammedî de dewleta Îranî vera şarê ma polîtîkaya qirkerdişê ziwanî ana ca. Dewleta Sûrîye hema zî rixmê destkewteyê ziwanê dayîke yê şarê ma kurdkî sey ziwanêkê resmî qebul nêkerdo.

Hukmatê Iraqî zî rixmê statuyê şarê Başûrê Kurdîstanî zî hema zî şaristanê Kerkûkî de vera kurdkî polîtîkaya qedexekerdişî ano ca. Lewheyanê şaristanî de nameyê kurdkî vurîyenê, dezgehanê petrolî de qiseykerdişê bi kurdkî yeno qedexekerdene, îmkanê wendekaranê ziwanê kurdkî yenê kêmkerdene. Ziwanê yew şarî beden, estbîyayîş û azadîya ê şarî yo. Mumkîn nîyo ke verî ke çar parçeyê Kurdîstanî yew bibê, azadî û estbîyayîşê xo bîyarê ca cuye wayîra manayêke biba.

Musayîş, qiseykerdiş û xebitîyayîşê seba ziwanê dayîke heqêko tewr xozayî, manadar û komelkî yo; sebebê estbîyayîşê merdiman o. Ziwanê dayîke nasnameyo esas ê pêro merdiman o. La kurdê ke nufusê înan 40 mîlyon o, hema zî welatê xo de bi hawayêkê azadî nêeşkenê bi kurdkî perwerde bivînê. No yeno manaya qirkerdişê tewr pîlî. Hukmatê AKP-MHPyî vera pêro ziwan û şaranê Tirkîya polîtîkaya qirkerdişê ziwanî û asîmîlasyonî ano ca.

Bi wesîleya Roja Ziwanê Dayîke ma reyna xebatanê ziwanî yê pêro dezgehan û kedkaran selam kenê. Ma venga pêro kurdan danê ke nê xebatan mende bikerê, perwerdekaranê xurtêran weye bikerê, giranîye bidê xebatanê akademîkan. Ma venga dadî û babîyanê kurdan danê ke wayîrê ziwanê dayîke vejîyê; keye, kargehan û her cayî de bi kurdkî biwanê, pê domananê xo bi kurdkî biwanê, melodayîyanê kurdkî bizêdînê û vengê înan vejê.''