Îstanbul û şaristananê Koln, Dortmun, Munihî yê Almanya de cinîyî ameyî pêser û înan vera betalkerdişê Peymana Îstanbulî nêrazîbîyayîşê xo mojna.

Îstanbul: Şaristanê Îstanbulî yê Tirkîya de cinîyan Şîşlî de çalakîyêke kerde. Çalakîye de sloganê sey 'Kişîyayîşê cinîyan polîtîk ê' û 'Peymana Îstanbulî cuye pawena' ameyî vatene. Rojda Aksoy nameyê cinîyan ser o eşkerayîyêke daye û pare kerd ke dewlete pê wedaritişê Peymana Îstanbulî cinîyî bêasayîş verdayî û verê sûcanê vera cinîyan akerd. Aksoye îfade kerd ke ê na bira betalkerdişî nêşinasnenê la ê do têkoşînê xo ra fek vera nêdê.

Koln: Cinîyan vengdayîşê Têgêrayîşê Cinîyan ê Ciwanan ê Zora ser o çalakîyêke kerde. Aktîvîsta Meclîsê Cinîyan ê Vîyane Şîlane Başûr eşkerayîya hempare ya Paştdayîşê Cinîyan ê Ewropa wende û da zanayene ke cinîyî qetî na bire qebul nêkenê û pîya do têkoşîn berz bikerê. Çalakîye de sloganê sey 'Ma hî nêkenê, nêtersenê û îtaet nêkenê' û 'Cinîye, cuye azadîye' ameyî vatene.

Dortmund: Dortmund de aktîvîstê YJK-E, Meclîsê Cinîyan ê Kurdan ê Rozerîne û DAKME zî tede xeylêk cinîyan bira betalkerdişê Peymana Îstanbulî ya AKP-MHPyî pê çalakîyêke protesto kerd. Eşkerayîya çalakîye de ame vatene ke cinîyî pê rêxistinî û yewîya xo eşkenê verê nê hêrişan bigêrê. Çalakîye pê sloganê 'Cinîye, Cuye, Azadîye' qedîyaye.

Munih: Vengdayîşê Yewîya Cinîyan ê Koçberan ser o Meclîsê Cinîyan ê Sara zî tede xeylêk aktîvîstan betalkerdişê Peymana Îstanbulî protesto kerd. Cinîyan ard ziwan ke ê do heta peynî Peymana Îstanbulî bipawê û vera hêrişanê AKP-MHPyî têkoşîn bikerê.