Maya Haştîye Kumru Akgul ANFyî rê qala hîkayeya xo, serebûtanê xo kerde. Dayîke Kumru mabênê serranê 2018-2019î de wextê grevê vêşanîye de verê Zîndanê Bakirkoyî de amebî destbendkerdene. 

Dayîke Kumru vat: ''Ma 10ê gulana 2019î de verê Zîndanê Bakirkoyî de ameyî destbendkerdene. Polîsan ma berdî Asayîşê Îstanbulî, uca de 7 polîsanê ke hetê serre ra qasê tornanê mi bîyî rixmê feryadê mi zî pê zorî kincê mi mi ra kerdî. Înan şerm zî nêkerd ez kerda kamera. Reya verêne çîyêko winasên amebi sereyê mi. Heq û hedê çewî çin o ke merdimêk zûrt bikero. Ma mehekem de qala ney kerde la mehkeme çîyêk nêkerd. La ma sey dadîyan semedo ke wazenê domanê ma biciwîyê yenê muhakemekerdene.''

Dayîke Kumru ard ziwan ke nika zî heman proses esto û vera tecrîdî reyna tepişteyî grevê vêşanîye kenê. Dayîke Kumru vat: ''Na pandemî de binpaykerdişê heqanê merdiman reyka zêdîyayî. Tecrîd sûcê merdimîye yo. Birayê mi Erdal Ozenî rê cezaya 16 serran dîyaye û nika hucreyê yewkesî de yo. Tede şeker, şîzofrenî û nêweşîya roqleyan estê. Wexto ke krîz ame ci herinda nêweşxaneyî de ame berdene bi ocaxê weşîye.''

Dayîke Kumru îfade kerd ke ganî waştişê tepişteyan bêrê caardene û tepişteyê nêweşî bêrê veradayene. Dayîke Kumru vat: ''Ez bi taybetî venga CPTyî dana. CPT ho ça de yo? Ê feryadê dadîyan nêeşnawenê? Nika zî ê qala qefilnayîşê HDPyî kenê. Heta ke dadîyî estbê ê nêeşkenê HDP biqefilnê. Wa no zulm hînî biqedo, bes o. Wa berê Îmraliyî bêrê akerdene û Birêz Ocalan keye û avûkatanê xo bivîno.''