Mayê Şemeyî seba ke aqûbetê merdimanê xo ke bizor ameyê vînîkerdene bimûsê û faîlê înan bêrê cezakerdene hewteyo 743’in ameyî têhet. Keyeyanê ke waşt Meydanê Galatasarîye de bêrê têhet reyna rastê vernîgirewtişê polîsan ameyî. Polîsan kuçeyê Komeleya Heqanê Merdiman (ÎHD) ê Şûbeyê Stenbolî girewt binê ablûqa, Mayan ê Şemeyî vernîya şûbeyî de eşkerayî daye.

 Parlamenterê HDP’yî yê Stenbolî û sereka CHP‘yî yê bajarê Stenbolî Canan Kaftancioglû zî tede xeylî sîyasetmedar, aktîvîst û hemwelatijî paştî daye çalakî. Çalakwanan ser o tîşortê ke fotografê vînîyan ser o estbî xora dîyayî, fotografê vînîyan û qerenfîlê sûrî kiriştî. Çalakîya nê hewteyî de, aqûbetê Ahmet Ustunî yo ke gama 25 serre bi Cizîre de, menga Nîsan a 1994 de bişewe saet dorê 23.00 de hetê kesanê bisîlehan ra ame destbendkerdene û dima ra ci ra xeberêk nêamî girewtene ame persayene.

 Eşkerayî hetê endama Komîsyonê Nezaretî de Vînîbîyayeyan ê ÎHD’yî Masîde Ocake amî dayene. Ocake vat, “Heqê merdimanê vînîyan esto ke aqûbetê kesanê ke ameyê destbendkerdene bizanê û kesanê ke nê qewimîyayîşan de ca girewtê bizanê. Dewlete mesuldarîya xo ya huqûqê mîyannteweyî bica nêana. Na yewe ra 743 hewteyî yo seba ke ma aqûbetê merdimanê ma yê ke bîyê vînî bizanê ma yenê têhet. No heqê ma yo û tu şertêk de ganî çinê nêro hesabkerdene. Ma meydanan de yê, kuçeyan de yê.”

 Dima ra birayê Husamettîn Yamanî yê vînîyî Feyyaz Yamanî qisey kerd. Yamanî vat, “Ma ancî tîya yê. Reyna seba dejêkê vînîbîyayeyî, seba cigêrayîşê heq û edaletî ma ameyê têhet. Vînîbîyayîşê Ahmetî 1994 o, yê birayê mi 1992 yo. Qasê emrê înan wext ser ra ravêrto, la hewna zî seba bicaameyîşê edaletî û huqûqî çîyêk nêameyo kerdene. Merdimê ke tîya yê û ma keyeyê vînîyan 743 hewteyî yo seba edalet û huqûqî yenê têhet û ma do mucadeleyê xo yê bicaameyîşê edaletî heta netîce bigêrê bidomnê.”