Emîne Şenyaşara ke mêrde û di lajê ci hetê pawitox û merdimanê Wekîlê AKPyî Halîl Îbrahîm Yildizî ra kişîyayî lajê xo Ferît Şenyaşarî reyde verê Edlîyeya Riha de 20 rojî yo çalakîya 'nobeta edaletî' rê dewam kena.

Meclîsê Mayanê Haştîye yê Mêrdînî, aktîvîstanê Têgêrayîşê Cinîyan ê Azadan (TJA) dayîke Emîne Şenyaşar zîyaret kerde.

Dayîke Emîne zîyaret de ard ziwan ke keyeyê Yildizî înan rê gef waneno û ê tena edalet wazenê.

Mayanê Haştîye ra Perîhane Altug zî îfade kerd ke wa waştişê edaletî yê Emîne Şenyaşar bêro caardene û vat: ''Ma hetê peynî hetê dayîke Emîne de yê. Ma wazenê dadîyî wa nêbermê, haştîye bêra.''

Hemsereka HDPyî ya Mêrdînî Perîhane Agaoglu vat: ''Ma na bêhuqûqîye qebul nêkenê. Ma do heya peyên hetê dayîke Emîne de bibê.''