Mayanê Haştîye Amed û Îzmîr de bi wesîleya Roja Dadîyan çalakîyî kerdî.

Meclîsê Mayanê Haştîye bi wesîleya Roja Dadîyan verê bînaya xo ya Amedî de eşkerayîyêke daye. Rêxistinê DEM Partî û DBPyî û keyeyê Nobeta Edaletî zî tewrê eşkerayîye bîyî.

Eşkerayîye de Maya Haştîye Kudrete Eryilmaz îfade kerd ke domanê înan hetê înan de nîyê coka Roja Dadîyan înan rê seke ''roja reşe'' ya. Dayîke Kudrete vat: ''Wexto ke domanê ma bêrê a roje do biba Roja Dadîyan. Ma ser ra teyarayî perrenê, tecrîd beno giranêr. Ma wazenê meseleya kurdan çareser biba. Wa haştîye bêra, zîndanan ra cenaza nêra vetene, dadîyî mebermê.''

Dima Endamanê Meclîsê Ciwanan ê DEM Partî qeranfîlî dayî dadîyan.

Îzmîr de Endamanê Meclîsê Mayanê Haştîye rayraşîyayîş kerd. Rayraşîyayîş de pankarta ''Dîyarîya tewr pîle haştî ya '' ameye akerdene û sloganê sey “Bijî berxwedana dayikan” û “Bijî berxwedana zindanan'' ameyî vatene.

Maya Haştîye Hanîfe Zengîn rayraşîyayîşî ra dima qisey kerd û vat: ''Domanê ma hucreyê yewkesî de tepişîyenê û zîndanan de mirenê. Ma waştêne ke ewro domanê ma wa hetê ma de bibê. Ma haştîye, edalet û azadîye wazenê.''