Eşkera bi ke Evîne Guneş (Fatma Demîrel) teda û mobîngê Mihemed Ronahîyî (Mehmet Aydin) ra semed xo kişto. Dîya zanayene ke Mihemed Ronahîyî pê merdimê xo yê qoricîyî Evîne rê gef wendo û kênaya Evîne tacîz kerda.
Evîne Guneş (Fatma Demîrel) Amed de xo kiştbi. Amebi parekerdene ke seba ke Evîne pê KHKyî ra karî ra ameya vetene û nêeşkena karêkê bînî bivîna xo kişto.
La dima medyaya dîjîtale ser o mesaj û vilakerdişê Evîne Guneş eşkera bîyî. Rojnamegere Rozarîne Urucu îfade kerd ke Evîne xokiştişî ra verî ci rê qeydê vengî şawitbi û qeydî de Evîne vatêne ke Mihemed Ronahî aye pê kiştişî tehdît keno, aye gerreyê Ronahîyî kerdo. Rozerîne Urucu da zanayene ke seba ke Evîne Guneş gerreyê xo apey girewt aye zî xebera nê gefan nêkerda.
Evîne Guneş qeydê vengî de vatêne ke aye hewteyêkî verî zî xîret kerd ke xo bikişa, wedarîyaye servîsê ciewnîyayîşê giranî. Evîne vato: ''Hînî ez daymîş nêbena.''
Evîne pare kerd ke tehdîtanê Ronahîyî ra dima aye gerreyê xo apey girewto û vat: ''Ma ey de pê kerd. Ma taxa Ofîsî de cayêk de roniştî. Hetê ey de dezayê ci estbi, ey nameyê dezayê xo nêvat la twitter de nameyê dezayê ci 'Parezer' bi. Dezayê ci vat ke dewa înan dewa agayan a, yanî dewa qooricîyan a. Dezayê ci vat 'Ap Salîhî bire daya. Eke ti gerreyê xo apey nêgêrî o do to bikişo.' Mi vat 'Eke mi nêkişo bêşeref o.' Ez hînî nêzanena ke se bikera.''
Evîne Guneş çend serrî verî pê KHKyan karî ra amebî vetene û kênaya xo ya 16 serre H. reyde ciwîyayêne. Ame parekerdene ke Mihemed Ronahîyî kênaya Evîne H. zî tacîz kerda. Evîne û kênaya ci H. pîya gerreyê Mihemed Ronahîyî kerdo. Reyna qeydêk de ame dîyene ke Mihemed Ronahîyî Evîne rê nêngê seksîstî çînayî.
Dima ke teda, gef û mobîngê Ronahîyî yê vera Evîne eşkera bîyî sere de cinîyan ê kurdan xeylêk kesan vera Mihemed Ronahîyî nêrazîbîyayîşê xo mojna. Rayaumûmîye wazena ke Mihemed Ronahî bêro tepiştene û muhakemekerdene.
Komeleya Cinîyan a Rosa zî derheqê babete de eşkerayîyêke daye û vat: '' Evîne serrêke verî muracatê komeleya ma kerd û vat ke Mihemed Ronahî ci rê şîdet keno. Waştişê aye ser o ma na rewşe dezgehê ci rê îfşa kerde. La dima seba ke Evîne gerreyê xo apey girewt ma zî prosesê huqûqî qedîna. Ma sey komele na babete de mesuldarîya xo qebul kenê. Evîne Guneş şîdetê dewlete û camêrdî ra semed neçare mende ke xo bikişa. Ma do seba ke mesuldarî cezaya xo bigêrê na babete teqîb bikerê.''
