Rayberîya Platformê Cinîyan ê Dîcle Amedî (DAKAP) de Warê Îstasyonî yê Amedî de bi şîarê ''Wext wextê azadîya cinîyan o'' mîtîngê 8ê Adare Roja Cinîyan a Dinya ame kerdene. Cinîyê ke bendanê kontrolî de ameyî astengkerdene, bi kortejan kewtî warî û mîtîngî dest pêkerd. 

Warê mîtîngî de cinîyan tedaya vera tepişteyanê nêweşan û cinîyan şermezar kerde. Mîtîng de seba Garîbe Gezera ke Zîndanê Kandira de amebî qetilkerdene deqayêk rêz ame girewtene. Dima Komîteya Amadekarîye ser o Berfîne Polat qisey kerd. Polate ard ziwan ke cinîyî vera polîtîkayanê qirkerdişî vengê xo berz kenê.

Polate ra dima Încîye Gulera ke Baroyê Amedî de nobeta edaletî gêna qisey kerd û vat: ''Wa tepişteyê nêweşî bêrê veradayene. Ma wazenê domananê xo het de bibê, ma wayîrê domananê xo vejîyê.''

Dadîya Garîbe Gezer Halîme Gezer zî vejîyaye sehne ser û beşdarî selam kerdî. Dayîke Gezere vat: ''Şima Garîbe yê'' û waşt ke tepişteyê nêweşî bêrê veradayene.

Hemvervatoxa Meclîsê Cinîyan ê HDPyî Ayşe Acar Başaran mîtîng de vat: ''Tecrîdê Îmraliyî pêro komelî ra vila bîyo. Ê wazenê pê tecrîdî embazanê ma zîndanan de çin bikerê. Ma reyna vanê ke adresê çareserîya meseleya kurdan Îmrali yo. Heta ke tecrîd biqedo ma do sey cinîyan têkoşînî rê dewam bikerê. Bi tewirê ma yê qerardarî ma do tecrîdî bişiknê û berê Îmraliyî abikerê.''

Başarane bale ante ser ke îqtîdarî hêrişê Wekîla HDPyî Semra Guzel keno û vat: ''Semra Guzel îradeyê nê şaristanî û cinîyan o. No îqtîdar pê polîtîkayanê xo wazeno îradeyê ma, destê ma ra bigêro.''

Qiseykerdişê Başarane ra dima hunermendî vejîyayî sehne ser.