Nawnayîşê 8ê Adare Roja Cinîyan ê Kedkaran a Dinya Wan de pê şîarê 'Vera qirkerdişê cinîyan ma cuye pawenê. Vera tecrîdî ma azadîye pawenê' dest pêkerd. Nawnayîş hetê Têgêrayîşê Cinîyan ê Azadan (TJA) û Meclîsê Cinîyan ê HDPyî ra ame serûberkerdene.

Warê nawnayîşî yê Parka Musa Anterî yê qezaya Rêya Armûşî pê balonanê mor û sipîyan xemilîya û platform de pankarta 'Serewedaritişê ma seba azadîya ma ya' darde bîye.

Agirî, Qers, Îdir û Colemêrgî ra cinîyî ameyî warê nawnayîşî. Vervatoxa Meclîsê Cinîyan ê HDPyî ayşe Acar Başaran zî tede xeylêk cinîyî pê kincanê tradîsyonelan tewrê nawnayîşî bîyî.

Warê nawnayîşî de 'Biciwîyo xoverdayîşê cinîyan' û 'Cinîye, cuye, azadîye' berz bîyî.

Hemsereka HDPyî ya Wanî Handane Karakoyun, Hemsereka DBPyî ya Wanî Gulderene Varli û Sereka Komeleya Cinîyan a Starî Serape Guvenç qisey kerd û înan şîdetê vera cinîyan şermezar kerd.

Wekîla HDPyî Dîlane Dîrayet Taşdemîr zî nawnayîş de qisey kerd û vat: ''Cinîyan ê kurdan ê sey Sakîne Cansiz pê tewirê xo tarîx nuşt ma pê înan sereberz ê. Îqtîdarê AKPyî xîret keno ke cinîyan ê kurdan qir bikero. Ma do pê xoverdayîşê cinîyan nê îqtîdarî qels bikerê.''

Taşdemîre dima mesajê Fîgene Yuksekdag û Sebahate Tuncel zî wendî. Tuncele û Yuksekdage xoverdayîşê cinîyan selam kerd û 8ê Adare yê pêro cinîyan fîraz kerd.

Wekîla HDPyî ya Mûşî Gulîstane Kiliç Koçyîgît zî nawnayîş de wina qisey kerd: ''Cinîyî seba ke 8ê Adare de 25ê Teşrîna Peyêne de meydanan de bîyî nika tepişte yê. Newroze verê ma de ya. Ma do reyna pîya meydanan de bibê. Serewedaritişê ma hêrsê ma keno xurtêr.''

Vervatoxa Meclîsê Cinîyan ê HDPyî û Wekîla Êlihî Ayşe Acar Başaran verî cinîyê tepişteyî selam kerd û vat: ''Vera tecrîdî zêdêr cinîyî xo ver danê. Şero ke semedê tecrîdî ra qewimîya tewr zaf cinîyan rê zerar dano. Coka waştişê çalakîkeranê grevê vêşanîye waştişê ma yê. Wa no tecrîdo bêhuqûq wedarîyo. Ez venga pêro cinîyan dana ke vera îqtîdarî têkoşîn bikerê. Xoverdayîşê ma do azadîye bîyaro.''

Qiseykerdişan ra dima Pinare Aydinlar vejîyaye sehne ser. Çalakîye pê govendan qedîyaye.