Hevrîne Xelef 15ê teşrîna peyêne ya 1984î de dewa Rêhanikî ya şaristanê Dêrikî ya Rojawanî de dadîya xo ra bîya. A 11 serrîya xo de tewra mîyanê Koma Tîyatroyî ya Newroze bena. Hevrîne Xelef 2009 de Zanîngehê Helebî de Muhendîsîya Înşaetî wanena û 19ê temmuza 2012î de zî tewra Şorişê Rojawanî bena. Hevrîne Xelef 2015 de Heyetê Komîte ya Cizîre de cagêna û dima bena Sekretera Pêroyî ya Partîya Ameyoxî ya Sûrîye.

Hevrîne Xelef dima ke dewleta tirke ya îşxalkere hêrişê Girê Sipî û Serêkanîyê kerd 12ê teşrîna verêne de Qamişlo de bi îşkence ameye qetilkerdene. Dima nameyê aye şaristanê Lyonî yê Fransa de dîya taxêke, Berlin de dîya Baxçeyê Şîfa, şaristanê Parma yê Îtalya de dîya pirdêkî.

Embazanê Hevrîne Xelef ra û Hemsereka Kantonê Qamişloyî Perwîne Yusuf ANFyî rê qala Hevrîne Xelef kerde.

Perwîne Yusuf pare kerd ke Hevrîne Xelef sey cinîyêka kurde mîyanê Şorişê Rojawanî de cagirewto û vat: ''Fikrê aye xurt bîyî ke qederê şarê xo dîyar bikera.  Hema domanîya xo de a pê hesîyabî ke erdê kurdan îşxalkerde yo û ziwan û kulturê kurdan qedexekerde yê. A bi erjanê welatperwerîye resabî. Aye hema  domanîya xo de felsefeya 'cinîyî azad nêbê komel azad nêbeno' tesdîq kerdbi. Aye seba cinîyan zaf xîret kerdêne.''

Perwîne Yusuf wina dewam kerd: ''Hevrîne kesêka winasêne bîye ke xo teslîmê zorî nêkerd. A şert û mercanê zehmetan ser o xeylêk fikirîyaye û kede daye. A bi şewe û roje xebitîyaye. Awankerdişê komêka qije ra heta partîya sîyasî aye tim gamêke eşte. Seba ke bieşka felsefeya azadîya cinîyan biresna cinîyan ê ereban zî xîret kerd. Aye seba Partîya Ameyoxî û Şorişê Rojawanî kedêka pîle daye.''