Seba vîrardişê kadroya serkêşe ya Têgêrayîşê Cinîyan ê Kurdan û ya PKK’yî Sakîne Cansize, temsîlkara KNK’yî ya Parîsî Fîdan Dogane û endama Têgêrayîşê Ciwanan Leyla Şaylemeze ê ke 9’ê Çele ya 2013’î de Parîs de ameybî qetilkerdene, bajarê Swîsre Zurîh de Festîvala Sakîne Cansize (Sara) ya 6’ine amî viraştene. Festîvala ke her serre sey tradîsyonêk yena viraştene bi coşêkê pîlî qedîyaye.

Festîvale Kasernenareal ê Zurîhî de bi serkêşîya Yewîya Cinîyan ê Kurdan ê Swîsre ame viraştene. Xeylî organîzasyonanê Swîsreyijan, Tirkîyayijan û koçberan zî organîzekerdişê festîvale de ca girewt. Hemeyê roje de, festîvale de bê mabên slogan “Cinî Cuye Azadîye” amî eştene. Festîvale bi slogan ‘Xoverdayîşê cinîye azad keno’ virazîyaye, her emrî ra cinîyî tewrê ci bîyî û qalê muhîmîya mucadeleyê hemparî yê cinîyan ê dinya ame kerdene.

Xoverdayoxanê grevê vêşanîye yê Strasbourgî ra rojnamegere Gulîstan Çîya Îke zî sey qiseykerdoxe tewrê festîvale bîye û qalê muhîmîya xoverdayîşê grevanê vêşanîye û destkewtişanê ke kewtê dest kerdî. Îke ard ziwan ke xoverdayîşê xoverdayîşê grevê vêşanîye û nê xoverdayîşî rê wayîrvejîyayîş şikitişê tecrîdê serê Ocalanî de bitesîr bîyo û vat do mucadeleyê înan wareyanê cîyayan de dewam bikero.

‘Mucadeleyê Sara, Mucadeleyê Cinîyan ê Dinya yo’

Festîvale de sere nameyê partîya BASTA de qiseykerdiş ame kerdene û ame vatene ke mucadeleyê azadîya cinîyan ê Kurdan mucadeleyê cinîyan ê dinya de wayîrê muhîmîyêka pîle yo. Dewamê qiseykerdişî de zî qalê mucadeleyê cinîyan ê hemparî ame kerdene û ame vatene ke mucadeleyê Sara, mucadeleyê cinîyan ê dinya yo.

‘Ganî Cinîyî Mucadeleyî Hîna Bikerê Xurt’

Festîvale de sere nameyê sazîyan ê cinîyan ê cîyayan de qiseykerdişî ameyî kerdene û qiseykerdişan de ame vatene ke Sakîne Cansize temsîlkarîya cinîyan ê dinya kena û ame pêhesnayene ke ganî cinîyî mucadeleyî hîna bikerê xurt.

Dimayê qiseykerdişan ra grûbanê govende û dansan ê kulturanê cîyayan hunerê xo pêşkêş kerdî. Xusûsen koma dansî ya cinîyan ê Hîndistanî rê eleqedarîyêka pîle ramojîyaye û bê mabên slogan “Cinî Cuye Azadîye” ameyî eştene.

Dima ra zî hunermende Pinar Aydinlare, Nûarîn û hunermendê Swîsreyijî vejîyayî sehne û hunerê xo pêşkêş kerdî. Festîvale heta ereyîya şewe bi govende û deyîran dewam kerd.