Endama Fermandarîya Pêroyî ya Hêzanê Sûrîyeya Demokratîke (QSD) Newroze Ehmed serra 2022yî ANFyî rê ercnaye.

Sey YPJyî şima serrêka bi pirrê têkoşînî xo pey de verdaye. No têkoşîn mîyanê kamyew şert û mercan de ame kerdene?

Hêrişê giranî çin bîyî zî 2022 serra têkoşînî bîye. Destpêkê serre de DAÎŞî hêrişê Xiwêranî kerd. DAÎŞî seba ke xo newe ra rêxistin bikerê hêrişê Xiwêranî kerd. Ma o çax hêrişêkê tehlukeyînî de têrî bîyî. Vera Kampa Holî zî hêrişî est bîyî. Ma zafê înan şikitî la tehluke hema zî dewam keno. Dewleta tirke emser hêrişê giranî kerdî û raşta raşte sivîlî kerdî hedef. Hêrişanê dewleta tirke reyde DAÎŞî zî hêrişê xo zêdînayî. Vera nê xîretanê DAÎŞî û hêriş û gefanê dewleta tirke têkoşînêko hemwext ame kerdene. Şarê ma û hêzanê ma bi îmkananê xo yê kêman vera nê hêrişan xo ver da. Na serre qasê 400 embazê ma şehîd bîyî. La rixmê ney zî ma tewirê xo yê biîradeyî ra fek vera nêda. YPJyî 2022 de zî mîsyonê xo yê serkêşîye ard ca. Embazanê ma hêrişê Xiwêranî de û hêrişanê bînan de tewr vernî de cagirewt û mesuldarîyanê xo ra tawiz nêda.

Hêrişanê dewleta tirke de cinîyê serkêşê ke vera DAÎŞî şer kerdbî, ameyî hedefkerdene. Cenabê to na babete senî ercneno?

Dewleta tirke bi hedefkerdişê nê embazanê ma armanc kerd ke komelî bêîrade verda, qesasê DAÎŞî bigêra, şar bida koçkerdene û xoverdayîşê şarî bişikna. Dewleta tirke teyna nê embazê serkêşî ney cinî îu domanê kênayî zî kerdî hedef û şexsê înan de waşt ke ameyoxê ma yê azadî qetil bikera. Embazê ma wayîrê mîrasê cinîyanê serkêşan ê şehîdan vejîyayî û şarê ma zî dîyar kerd ke ê do têkoşînî ra tawiz medê. Nê hêrişan ra dima xeylêk cinîyî tewrê têkoşînî bîyî.

YPJyî têkoşînê vera DAÎŞ û dewleta tirke de rolêko serkêş ard ca. Şorişê Rojawanî sey Şorişê Cinîyan tarîx de cayê xo girewt. Emser şima têkoşînê vera DAÎŞ û dewleta tirke de têkoşînêko senîn ard ca?

Ma serewedaritişê Rojhelatê Kurdîstanî de dî ke têkoşînê YPJyî senî tesîrê dinya keno. Têkoşîn û estbîyayîşê YPJyî hişmendîya cinîyan a dinya vurna. Emser zî herême de têkoşînê YPJyî yê vera hêrişanê îşxalî bi sebebê berzkerdişê xoverdayîşî. Her ke têkoşînê ma dinya de vila beno mesuldarîyê ma zî zêdîyenê. Dişmen zî her ke tesîrê ma beno pîlêr tira aciz beno. Têkoşînê ma dinya de zaf veng vejeno. Ma zanenê ke wezîfe û erkê ma zêdîyayê. Dişmen tesîrê ma yê serê dinya vîneno coka bi hêrsî hêriş keno. Ma wezîfe û mesuldarîyanê xo ra hayîdar ê. La hewceyê ma yê bi destekêkê pîlî est o.

Ma emser kerd ke bibê cewabê persan û têkoşînê cinîyan. Nê esasî ser o heta destê ma ra ameyî ma cewab da vengdayîşê cinîyanê Afganîstanî. Reyna Konferansê Cinîyan o Mîyanneteweyî zaf girîng bi ke ma tede tecrube, ceribnayîş, mesele û çareserîyê înan pare kerdî. Goreyê şertanê herême têkoşînê YPJyî kerd ke îmkanê heqê cuya têdûşte, sîstemê hemserekîye bizêdîyê. Ma emser destkewteyê pîlî vistî destî. Rixmê hêrişan û îmkananê kêman zî ma kenê ke xo biresnê pêro cinîyan.

Seba 2023yî mesajê şima yê seba cinîyan çita yo?

Seba azadîya ma çew têkoşîn nêkero. Ganî cinîyî bi xo seba azadîya xo têkoşîn bikerê. Ma seba azadîye bedelî dayî la ma qetî têkoşînê xo ra fek vera nêda. Ganî cinîyî tim xo rêxistin bikerê û bieşkê ke xo bipawê. Ganî cinîyî vera hişmendîya îqtîdarî xo bipawê ke Qirkerdişê Parisî yê 23yê Kanûne zî no îsbat kerd. Têkoşînê 2023yî bi tecrube û erjanê serra 2022yî ganî bêro berkerdene. Ganî cinîyî wayîrê şehîdanê xo vejîyê, yew bibê û heqanê xo bivisnê destî. Ma do bi paştdayîşî azadîya cinîyan bîyarê ca. Ma bi azadîya cinîyan do azadîya komelî zî bîyarê ca.''