Mayanê Plaza de Mayo ra Nora Morales Cortiñase bale ante qerardarîya Leyla Guvene ser û vat nê mucadeleyî aye ser o zaf tesîr kerdo.

Sey Mayanê Şemeyî yê Stenbolî Mayê Plaza de Mayo her hewte Meydanê Mayo de yenê tehet û semedê vindîbîyayê domananê xo û vîndîbîyayê 30 hezar kesan edelet wazenê. Çalakîya mayanê Arjantînijan 42 serrî xo ya dima verdayî. Nê meydanî de azadîya Ocalanî zî yena waştene û mesajê paştdayîşê şarê Kurdî yenê dayene.

Mayanê Plaza de Mayo ra Nora Morales Cortiñase ya ke menga Adere de gama ke Leyla Guvene grevê vêşanîye de bî a ziyaret kerde çalakîya Plaza de Mayo de derheqê xoverdayîşê şarê Kurdî de nê vatî: ’’Seke yeno zanayene Ocalan 20 serrî yo Îmrali de yo û Leyla Guvene 6 mengî cuwa ver semedê wedartişê tecrîdê serê Ocalanî dest bi girevê vêşanîye kerd. Çalakîya ke bi hezaran tepişteyê sîyasîyî tewrê ci bîyî bi vatişê Leyla, ‘ Semedê merdişî nê bi waştişê cuyeyêka bianore’ ameye viraştene. Dimayê çalakîya 200 rojan vernîya dîyayîşê Ocalanî abi û na dewa heme dinya de ameye vînayene. No semedê ra Erdogan mecbûr mend ke qedîyayîşê tecrîdî bidê eşnawitene.’’

Nora Morales Cortiñase dimayê çalakîye ANF’yî rê qisey kerd û nê vatî: ‘’ Roja verêne seke mi Leyla Guvene ziyaret kerde, xoverdayîşê aye mi ser o zaf tesîr kerd. Reyna hurmet û heskerdişê vera Raybero sîyasî Abdullah Ocalanî zî  da mi hîskerdene ke  no xoverdayîşêko raşt ê yew şarî yo. Mi heskerdişê nê merdiman teqdîr kerd.  Xoverdayîş kewte ser la hêrişê Erdoganî nêqedîyayî. Ez Leyla rê zaf heskerdişê xo şawena. Senî ke bi xoverdayîşê xo semedê şarê xo ser kewte nika zî wa semedê weşîya xo wina xover bido. Ez Leyla û heme xoverdayoxan rê serkewtiş û cuyeyêka bianore wazena.’’