Endama Koordînasyonê KJKyî Hêvî Nûda bi wesîleya 8ê Adare ANFyî rê qisey kerd.

Qiseykerdişê Nûda ra beşêk wina yo:

''Kurdîstan de hêrişê AKP-MHPyî yê vera cinîyan û destkewteyanê cinîyan asta tewr berze de dewam kenê. Bi taybetî vera têkoşînê ma yê azadîya cinîyan, vera ciwanan polîtîkayê şerê taybetî yenê caardene. Polîtîkayê sey tecawuz, şantaj, ajanîye bîyê polîtîkayê serekeyî yê dewlete. Ganî vera nê polîtîkayan ciwan û cinîyî rêxistinîya xopawitişî bikerê, tewrê têkoşînî bibê; ganî keyeyî zî hayîdar bibê. Têgêrayîşê cinîyan, rêxistinê komelê sivîlî, ganî xebatanê winasênan bikerê ke polîtîkayanê şerê taybetî pûç bikerê, cinî û ciwanan roşnî bikerê. Sere de têgêrayîşê cinîyan, rêxistin û dezgehê komelkî ganî bivînê ke babeta hêrişanê şerê taybetî, hişmendîya serdestîya camêrdan û raştîya sîstemê ciwanan de kêmasîyê ma estê.

Hemleya ma ya 'Vera qirkerdişê cinîyan wext wextê pawitişê cinîya azad û komelî yo' vera polîtîkayanê dewlete û îqtîdarê AKP-MHPyî bena tewirêko global. Hemleya ma vera qirkerdişê cinîyan, têkoşînê bi îdîa û qerardarîya azadîya cinîyan gamêka heyatî ya. Hemleya ma armanc kena ke hêrişanê vera cinîyan biqedîna, têkoşînê cinîyan berz bikera. Hemleya ma heta nika netîceyê girîngî ardî ca. 8ê Adare de zî hemleya ma pê çalakîyan do geş biba.

Felsefeya Rayberîye cinîyî kerdî rojdem, girewtî merkezê xo. Têkoşînê cinîyan ê kurdan zî bi na felsefe nika bîyo global. Şorişê Rojawanî bi paradîgmaya Rayber Apoyî ser kewt û hêzê têkoşînê cinîyan ê kurdan îsbat kerd. Ewro ma eşkenê vajê ke têgêrayîşê cinîyan ê kurdan têgêrayîşê cinîyanê dinya rê rayberîye keno. Ma bi tecrubeyê xo zî Konfederalîzmo Demokratîk ê Cinîyan ê Dinya naro.

 Ma sey têgêrayîşanê cinîyan 2022 de hêrişan û polîtîkayanê şerê taybetî reyde têkoşîn û xoverdayîşê xo geş bikerê. Ma do na 8ê Adare de bi hemleya xo verî azadîya Rayber Apoyî bîyarê rojdem, têkoşînê seba azadîya ey geş bikerê. Peynîya îqtîdarê AKP-MHPyî ameyo. 8ê Adare rayberîya cinîyan de ganî bibo startê geşkerdişê têkoşînî û qedînayîşê AKP-MHPyî. Rojawan de ganî 8ê Adare de cinîyê kurd, ereb, asûr, armenî, êzidîyî bibê yew, Mexmûr û Şingal de cinîyî bi tewirê xo vera faşîzmî mesajê xo bidê.  Başûr de cinîyî wa şexsê PDKyî de vera pederşahîye vejîyê meydanan û îradeyê xo bimojnê. Rojhelatê Kurdîstanî de zî ganî cinîyî hem zere hem zî teber de zemînê têkoşînê yewîye biercnê.

Ma hêvî kenê ke 8ê adare emser pêro waranê têkoşînî, cinîyanê kurdan û dostanê kurdan de azadîya Rayberîya ma û azadîya cinîyan qerardar bikerê, ma hedefanê xo dîyar bikerê, hesabê hêrişan bipersê. Ganî pêro cinîyî vera sîstemê serdestîya camêrdan bibê yew. Bi nêzdîbîyayîşê 8ê Adare ma hînî zêdêr xurt ê. ma sey cinîyan hînî zêdêr wayîrê hişmendî û tecrubeyê têkoşînî yê. Ma do qetî ser bikewê. KJK qerardar o ke têkoşînê cinîyan û şarê xo rê dewam bikero. Bi nê hawayî ma 8ê Adare fîraz kenê û her kesî rê serkewtiş wazenê.''