Partîya Azadîya Cinîyan a Kurdîstanî (PAJK) bi wesîleya 8ê Adare Roja Cinîyan ê Kedkaran a Dinya eşkerayîyêke daye. 

Eşkerayîya PAJKî wina ya:
''Ma şexsê cinîyan ê kedkaran de sergêra 122. ya Roja Cinîyan a Dinya fîraz kenê. Ma afernoyaxanê 8ê Adare  şexsê Roza Luxemburg, Clara Zetkin û 129 cinîyanê ke vera neheqîye ganê xo feda kerdî, de bi minet û hûrmet yad kenê. Rayber Apoyo ke felsefel, îdeolojî û artêşbîyayîşê azadîya cinîyan ronayî, ma 8ê Adare yê ey zî fîraz kenê û ey selam kenê. Ma şexsê embaze Sara, Şîlane Kobanê, Şîrîne Elemhulî, Viyane Soran, Zîne, Leyla de pêro şehîdanê xo yê cinîyan yad kenê û ma sozê xo yê serkewtişî dibare kenê. Ma 8ê Adare yê pêro cinîyan ê kurdan, Rojhelatê Mîyanênî û dinya fîraz kenê.

Tarîxê têkoşînê cinîyan ê seserra 19. û 20. de 8ê Adare wayîrê girîngî û nîşaneya destpêkê neweyî ya têkoşînî ya. Xoverdayîşê cinîyan pê bedelanê pîlan netîceyî girewtbî. 8ê Adare rewşa komel û cinîyanê seserra 19. û 20. zî ercnayêne. Ewro 8ê Adare destpêkê dewrê xoverdayîşî yê neweyî zî îfade keno. Ewro 8ê Adare bîyo roja xoverdayîş û serewedaritişê vera seksîzm, hîşmendîya netewe-dewlete, sîstemê serdestîya camêrdan û dînperestîye.

Bingeyê pêro meseleyanê cinîyan, neteweyanê bindestan û pêro şaran de hîşmendîya camêrdîye esta. Pawitoxa verêne ya nê sîstemî dewlet a ke pê ci nê meseleyî bîyî giranêr. Cinîyan û merdimîye tim vera nê sîstemî xo ver da û sere wedarit. Sîstemê serdestîya camêrdan tim xo ferz kerd û verê çareserîyan girewt. 

Sîstemê camêrd-dewlete Tirkîya de pê rejîmê AKPyî Tirkîya û Vakurê Kurdîstanî vurnayê zîndanê cinîyan ê zanayeyan, têkoşeran, xoverdayoxan û serewedaritoxan. Rejîmê Îranî zî pê dardekerdişê cinîyan morê xo da binê tarîxî û dişmenîya xo ya vera cinîyan eşkera kerde. Coka zanistê têkoşîn û cigêrayîşê raştîye yê cinîyanê Îranî do sîstemê camêrdan birijno û cuya azade awan bikero. Pir eşkera yo ke têna têkoşînê cinîyanê ke estbîyayîş û rêxistin qezenç kerdo eşkera welat hîşmendîya camêrdan ra bixelisno. Têkoşînê cinîyan Kurdîstan de îradeyê azadîye awan kerd û yewîya cinîyanê Rojhelatê Mîyanênî  aver beno.

Hînî vera nê sîstemê xeripîyayeyî ganî têkoşînêko rêxistinkerde, yew û zanistî yê cinîyan bêro kerdene. Seserra 21. firsend dana cinîyan de na seserra bikerê yê azadîya cinîyan û komelî. Rayber Apoyî na raştîye dîye û pê awankerdişê partîya cinîyan cewab da sîstemê camêrdan. Na hemle tarîxê têkoşînê cinîyan de vera camêrdan derbêka tewr manîdare û pîle bîye. 

Rayber Apoyî pê eşkerakerdişê metodanê azadîye û xorinkerdişê felsefeya cuya azade, manîfestoyê xelisnayîşê cinîyan seba cinîyan, kurdan û merdimîye dinyayêka newîye afernaye. Rayberîye girîngî daye xebatanê têkoşînê azadîye, cinî û komelê kurdan dormeyê têkoşînê azadîye de kom kerdî. Bi nê hawayî hêzê cinîyan ê kurdan ewro bîyî tek hêzê şorişî. coka Kurdîstan bîyo merkezê şorişê mezgî û komelkî. Bi nê hawayî tarîxê cinîyanê Kurdîstan, Rojhelatê Mîyanênî û dinya newe ra nusîyeno. 

Ewro sîstemê camêrd-dewlete vera awanîya yewîya cinîyan pê pêro metodan hêriş keno. Mabênê cuya cinîyan û sîstemê camêrdan de qerifîyayîşêko ruhî, perwerî, sîyasî û komelkî virazîyayo. Hînî mumkîn nîyo ke cinîyî reyna abigêrê binê emrê hîşmendîya camêrd-dewlete. Coka şero nikayên ê Kurdîstanî şerê awankerdişî û caardişê cuya azade yo. Raştîya ruhê xoverdayîşî Kobanê, Reqa, Şingal û Garê de awan bi û na raştîye berdewamîya xeta cuya azad a. Cinîyanê ke her cayê dinya ra verê xo da Kobanê ruhê 8ê Adare newe ra kerd gandar. No kombîyayîşo tarîxî yê cinîyanê dinya ganî pêro cinîyî ney sey destkewteyêk bivînê û wayîrê ci vejîyê.

Ma pê nê têkoşînê pîlî û kombîyayîşê cinîyan ê tarîxî 8ê Adare pêşwazî kenê. Asta têkoşînê cinîyan beno ke qîm nîya ka her wextî ra zêdêr bihêzêr, bizanist û rêxistinkerde ya. Ewro cinîyî benê yew veng û pîya pê têkoşînî dêsanê dinya rijnenê û dinyaya xo awan kenê. Serkewtişê ma yo tewr pîl o ke ma bi hawayêkê têdûştî hîşmendîya camêrdan hol fam kerde û şîroveyê ci kerd. Coka 8ê Adare de ma seba pêro cinîyan ê qurbanan yenê pêser. Ma bi nê hawayî soz danê ke ma do wayîrê têkoşînê cinîyan vejjîyê.  Ma sey cinîyan ê kurdan û rayberanê partîya cinîyan 8ê Adare pê qerardarîya tarîxî ya têkoşînî manadar kenê û wayîrê ci vejîyenê.

Nê esasî ser o ma bi wesîleya 8ê Adare Roja Cinîyan ê Kedkaran a Dinya venga pêro cinîyan danê ke vejîyê meydanan, seba cuya azade û têdûşte biqîrê. Na roja manadare de sozê xo yê resayîşê serkewtişî yê têkoşînî dibare bikerê. Ma reyna 8ê Adare yê cinîyanê Rojhelatê Mîyanênî û pêro cinîyanê dinya fîraz kenê. M sozo ke da cinîyan ê şehîdan û têkoşîneran dibare kenê.''