Koordînasyonê PAJKî bi eşkerayîya nuştekîye şehîdê Parisî yad kerdî û nê vatî:

"Ma serrgêra 10. yê şehadetê înan de kadroyanê serkêş û ronayoxan ê PKKyî ra hemra Sara, xoverdayoxê têgêrayîşê azadîye hemrayî Rojbîne û Ronahî yad kenê. Ma şexsê şehîdanê têkoşînê xoîdarekerdişî Sevê, Fatma û Pakîze û şehîdanê qirkerdişê diyînî yê Parisî Evîne Goyî, Abdurrahman Kizil  û Mîr Perwerî de heme şehîdanê têkoşînê azadîye yad kenê.

Ma do bi hewayêkê qerardarî têkoşînî xo girdêr bikerê û dewleta tirke ya qirkere û paştgêranê ci hêzanê mîyanneteweyîyî ra qesas bigêrê. Ganî her kes bizano ke pê nê qirkerdişan qet yew hesabo leymin û plan ser nêkewno. Ma sey partî û mîlîtanê ke xeta têkoşînî ya embaze Sara de xover danê bi şorişê cinîyan o ke bi felsefeya 'Jin, Jiyan, Azadi' her ca de vila bîyo, do qesasê heme qirkerdişan bigêrê.

Dewleta tirke û hukmatê ci yê şerî yê AKP-MHPyî  semedê îmhakerdişê têgêrayîşê azadîye vera kurdan şerê girdî rayra bena. Nê şerî pê metodanê tewr leymin û wehşîyan kena. Qirkerdişê 9ê Çeleyê 2013yî û 23ê Kanûna 2022yî  dewamê sûcê şerî yê dewleta tirke yê vera kurdan û cinîyan ê serkêşan o. Dewleta tirke ya faşîste pê qirkerdişê diyînî yê Parisî reyna mojna heme dinya ke dişmena tewr pîle ya kurdan û cinîyan ê kurdan a. Dewleta tirke kurdanê zaneyeyan ê ke wayîrê ercanê xo vejîyenê xo rê sey tehdîtî hesibnena. Îqtîdaro faşîst her wextî ra zafêr hêrişkar o. La kurdan senî heta ewro vera hêrişan çok nêda do ewro ra tepîya zî pê têkoşînî cewab bidê.

Kurdî û dostê înan reyna wayîrê şehîdanê xo vejîyayî. Ma nê vindertişî wayîrvejîyayîşî selam kenê. Serrgêra Qikerdişê 9ê Çeleyî de hemraya ma Evîne, Mîr Perwer û Abdurrahman Kizil ameyî qetilkerdene. Peyê nê hêrişî de xeylêk hesabê leyminî yê dewleta tirke û hêzanê mîyanneteweyîyî est ê. La şarê ma, cinîyê kurdan û dostanê kurdan wayîrê têkoşînê azadîye yê şarê ma vejîyayî û planê peyê qirkerdişî betal kerdî.  Senî ke Rayber Apoyî 10 serrî verî qirkerdişê vera embazan Sara, Rojbîne û Ronahî betal kerd, ewro zî cinîyan ê kurdan û şarê ma pê tewirê xo yê polîtîkî û têkoşînê xo qirkerdişê diyînî yê Parisî zî betal kerd.

Ma do semedê roşnîkerdişê wird qirkerdişan, rijnayîşê sîstemê Îmraliyî, rijnayîşê îqtîdarê AKP-MHPyî  têkoşînê xo girdêr bikerê. Ma do dewleta tirke û paştgêranê ci hêzanê mîyanneteweyîyî ra zî hesab bipersê. Şarê ma pê xurtkerdişê têkoşîn û xoverdayîşî do hesabê heme qirkerdişan biperso. Semedê roşnîkerdişê qirkerdişan do têkoşîno huqûqî û sîyasîyî zî bêro domnayene. Bi nê qerardarîye ma reyna hêrsê xo yê vera qirkerdişan anê ziwan.''