Koordînasyonê PAJKî seba 8ê Adare Roja Cinîyan ê Kedkaran a Dinya eşkerayîye daye. Eşkerayîya wina ya:

''Ma 8ê Adare yê Rayber Apoyî fîraz kenê ke warê cuye de azadîya cinîyan viste merkezî. Ma xoverdayîşê fîrazî yê Rayberîye fîraz kenê, şexsê şehîdanê têkoşînê azadîye Tolhildana Raman, Sosine Bîrhat,Şîlane Goyî, Sozdare Cûdî, Awaze Urmiyê, Xerîbe Gezer û Nûjiyane Ocalan de pêro şehîdanê cinîyan û şorişê merdimîye bi hûrmet û minetî yad kenê.

Têkoşînê cinîyan ê Kurdîstanî, Rojhelatê Mîyanênî û dinya astêka girîng û tarîxî de yo. Eke cinîyî bieşkê na asta tarîxîye bizivirnê serê têkoşînêkê hemparî, bi hêzê xoverdayîş û rêxistinîye, ê do bibê serfîrazîya cinîyan û pêro merdimîye. Qerardarî û tewirê cinîyan ê 8ê Adare do bibê nîşaneya têkoşînê hemparî yê vera hêzanê hegemonîlan û sîstemê ci yê şer, qirkerdiş, tecawuz, îşxal û talanî.

Modernîteya kapîtalîsta bi hêzê teda yê netewe-dewlete û hişmendîya serdestîya camêrdan, pêro waran de vera cinîyan û komelî şerêko tirsnek û rijnayîşî kerdo. Şerê hêzanê hegemonîkan Efganîstan, Iraq, Lîbya, Yemen, Sûrîye ra dima nika zî Ukrayna de yo. Reyna faturaya şerî cinîyan rê û komelî rê birîyena. Hişmendîya serdestîya camêrdan seba ke destkewteyanê cinîyan xo rê sey tehluke vînena bi her hawayî hêrişê înan kena. Şîdet, kiştiş û qirkerdişî ra bigêre, heta şerê taybetî, tecawuzî ra heta kargehan, keyeyan û ferzkerdişî madeyanê tîryakî no sîstem şexsê cinîyan de vera pêro komelî yeno caardene. Vera nê çerxê xokiştişî xoverdayîşê cinîyan, rêxistinîya cinîyan, xopawitiş û cepheyê têkoşînî ganî seba her cinîye sey erkêkî bêrê dîyene û cinîye her hele seba ney têkoşîn bikerê.

Şero tewr pîl û çetin ewro Kurdîstan de xeta azadîya cinîyan de yeno kerdene. Dewleta tirke ya kolonyalîste û qirkere bi serkêşîya Erdogan-Bahçelî vera cinîyan ê kurdan û şexsê înan de vera şaranê herême dişmenîya tewr pîle aver benê. Şexsê Erdogan û Bahçelîyî de hişmendîya serdestîya camêrd-dewlete vera cinîyan û komelî îfadeyê xo vînena. Ê pê girankerdişê tecrîdî zî qesas gênê. Vera Rayber Apo tecrîd û îşkence dewam kenê, vera cinîyan zî polîtîkaya qirkerdişî Vakurê Kurdîstanî ra heta Rojawan, Başûr, Şingal û Mexmûrî hetê dewleta tirke ra yena caardene. Hedefo verên ê polîtîkayanê qirkerdişî hêz û îradeyê kurdan ê azadan, çinkerdişê bingeyê azadîya cinîyan o. Vera nê hêrişanê dewleta tirke pêro cinîyî sey cinîyan ê kurdan ganî têkoşînê xo pîl bikerê.

Kurdîstan de rayîrê pûçkerdişê polîtîkayanê qirkerdişî, parçekerdişê sîstemê tecrîd û îşkenceyî yê Îmraliyî û qedînayîşê rejîmê faşîstî yê AKP-MHPyî berzkerdişê xeta xoverdayîşî ra derbaz benê. Têkoşînê têgêrayîşê ma yê azadîye yo 50 serre na xete de israr keno û serkêşî û çêran pîlan ê cinîyan ewro resneno karakterêkê têkoşînî yê globalî. Ma sey PAJKî nê esasî ser o azadîya Rayber Apoyî kenê merkezê têkoşînê xo. Cuya azade, demokratîke û têdûşte bi azadîya Rayberîya ma mumkîn a. Rayber Apo Kurdîstan de, ruhê têkoşînê 8ê Adare, esasê xelisîyayîşê cinîyan de awan kerd û manadar kerd, resna raştîya azadîya cinîyan. Coka ma sey cinîyan ê kurdan û milîtananê xeta Apoyî azadîya Rayber Apoyî sey azadîya xo vînenê.

Hemleya 'Vera qirkerdişê cinîyan wext wextê pawitişê komel û cinîya azade yo' û Hemleya Wextê Azadîye bingeyê azadîya Rayberîye de ameyî averberdene. Bi ruhê têkoşînê 8ê Adare yê cinîyan û bi ruhê Roşanê Newroze sere de cinîyê kurdî û şarê ma her kes dormeyê xeta Rayberîye de bi çemberêk. Coka ganî pê berzkerdişê têkoşînî û israrê pawitişê cuya azade bi tewirêkê xurtî cewab bêro dayene hêzanê îşxalkeran û kolonyalîstan.

Destpêkê adare ra nata pêro Kurdîstan û dinya de cinîyî wayîrê roja xo vejîyenê û bi çalakîyanê cîyayan payan ser de vindenê. No zî mojneno ke cinîyî wayîrê erjanê xo vejîyenê û înan pawenê. Heman wextî de waştişê nê cinîyan gandarkerdişê mîrasê Clara, Roza û Sarayan o.

Ma nê esasî ser o qerardarî û bawerîya cinîyan û şaran ganî kenê. Ma bi perwerî û hesreta azadîye ya cinîyan xoverdayoxan 8ê Adare yê pêro cinîyanê şorişî û cinîyanê dinya fîraz kenê. Ma sey PAJKî têkoşînê cinîyan, cuya azade û xoverdayîşê înan bi şorişê cinîyan do bîyarê ca. Ma bi wesîleya roja têkoşînê cinîyan 8ê Adare soz danê ke têkoşînê azadîya cinîyan pîl bikerê. Roja 8ê Adare ya pêro tepişteyanê dewaya azadîye, gerîlayanê YJA-Starî, pêro milîtanan û pawitoxanê xeta Rayber Apoyî û pêro cinîyan fîraz kenê.''