Meclîsê Ciwanan ê HDP’yî yê Amedî vizêr waşt bi slogana ‘Şer nê, bi sîyasetê demokratîkî ma bêrê têhet‘ vernîya organîzasyonê HDP’yî yê Qezaya Peyasî de rayraşîyayîşêk bikero. Bi qerarê walîtîye rayraşîyayîş ame qedexekerdene. Alozîye de polîsan parlementera HDP’yî ya Amedî Dersîm Dage û şêwirmenda aye Leyla Akgule û şêwirmendê parlementere Salîha Aydenîze Omer Aksoy destbend kerdî. Dimayo ke saetêk wesayîtê nezaretî de ameyî girewtene ameyî veradayene.

Parlamentera HDP'yî ya Amedî Salîha Aydenîze zî razînêbîyayîşê xo hemverê tewirê polîsan de ramot, ê mabênî de polîsan da Aydenîze ro. Aydenîze vat walî mesuldarê şidetê hemverê ma yo. Polîsî walîyî ra fermanan gênê û hêrişê ma kenê. Polîsî çende danê ma ro zî yenê pawitene. Goreyê zîncîrêka fermane têgêrenê. Îqtîdarî welat açarnayo wareyê şidetî. Mesuldarê nê şidetan zî bi dore îqtîdar, walî û asayîş o. Aydenîze û şêwirmendê aye Omer Aksoy seba raporo ke ramojneno dîyayo înan ro bigêrê şîyî nêweşxane û raporê pirodayîşî girewt. Aydenîze da zanayene ke ê do qey şideto ke ameyo kerdene gerre bikerê. Parlementere Dersîm Dage zî ard ziwan ke do gerreyê polîs û muduranê înan bikerê.