Endama Koordînasyonê Kongreya Starî Rîhane Loqo derheqê 8ê Adare Roja Cinîyan ê Kedkaran a Dinya de ANFyî rê qisey kerd.

Rîhane Loqo da zanayene  ke ê sey Kongreya Starî pêro rêxistinanê cinîyan ê Rojawanî reyde têgêrenê, pîya xebatan kenê. Coka ê plansazîya 8ê Adare zî pîya kenê. Rîhane Loqo îfade kerd ke herêmanê rejîmê Sûrîye de zî têkilîya înan a bi cinîyan esta, Lubnan, Başûrê Kurdîstanî û Ewropa de merkezê Kongreya Starî estê û ê wazenê Ewropa de rêxistinîya xo geşêr bikerê.

Rîhane Loqo vat: ''Ma babetanê edaletê têdûştî, heqanê cinîyan û vera zewajê domanan û zewajê bizorî xebatanê xo rê dewam kenê. Ma sîstemê hemserekîye ser o bi giranî vindenê û Rojawan de pêro waran de nê sîstemî anê ca. Ma babetanê tarîxê cinîyan, jieolojî, raştîya cinîyan, hişmendîya serdestîya camêrdan, têdûştîye dersî dayî camêrdan û hema hema pêro camêrdî nê babetan de ameyî perwerdekerdene.

Ma pê fikrê xopawitişî têgêrenê. Cinîyan mîyanê hêzanê pawitişî de rolê pîlî girewtî xo mil. Seba ke wayîrê Şorişê Rojawanî vejîyê, cinîyan şewe û roje destkewteyê şorişî pawitî. Ma sûcê dewleta tirke yê vera Efrîn, Serêkanîyê, Îdlîb, Cerablusî zî belge kerdî ke waranê mîyanneteweyîyan de nînan eşkera bikerê. Kampan de zî xebatê ma bi tewrbîyayîşê şarî dewam kenê.''

Rîhane Loqo bale ante têkoşînê cinîyan de rolê Rayberê Şarê Kurdî Abdullah Ocalanî ser û vat: ''Bi feslefe û îdeolojîya Rayber Apoyî têkoşînê cinîyan geş bi, pîl bi û heta ewroyî ame. Ma sey cinîyanê Rojawanî bi şîarê 'Ma do şorişê bipawê, erdê xo azad bikerê' 8ê Adare de azadîya Rayber Apoyî biwazê. Azadîya Rayber Apoyî azadîya cinîyan a.

Ma yewîye, averşîyayîş û rêxistinîya xo, komelê azad, têdûşt û demokratîkî awan bikerê. Çew nêeşkeno verê ma bigêro. Ma venga pêro cinîyan danê ke 8ê Adare de vejîyê meydanan. Ma sey cinîyan bi îradeyê xo yê azadî têkoşîn bikerê, dinya rê îlan bikerê ke ma do ser bikewê.''