Hemsereka Yewîya Cinîyan a Zenobîya Xosa Îsa Elî derheqê xebatanê înan de ANFyî rê qisey kerd.

Verê şorişî  Sûrîye de rewşa cinîyan mîyanê komelî de senî bi?

Qet yew mîsyonê cinîyan cînêbi. O wext Reqa de tay dezgehê cinîyan bibî la têna nameyê înan dezgehê cinîyan bî. Goreyê îdareyê şamî xebatî kerdêne. Cinîyan têna xizmetê rejîmê BAASî kerdêne. Cinîyanê ke paştî dayêne rejîm têna ê komel de vejîyayênî vernî. Xora teberî ra kesê ke pabesteyê rejîmî yê ameyêne komel îdare kedêne. Tîya kesanê ke unîversîte wendo zî mecbur keye de mendêne. Nê sîtemî tem 40 serrî dewam kerd.

Sûrîye de wextê serewedaritişî de destpêkerdişê şorişî de cinîyan  senî rol girewt?

Wextê destpêkerdişê şorişî de cinîyan zî waşt cayê xo bigêrê la şoriş xeta xo  ra vejîya  û cinîyî reyna teber de mendî. Cinîyan şorişê Sûrîye ra zaf çî pawetêne. Hêvîye kerdêne ke biresê azadîye û heqanê xo. Şoriş rayîrê xo ra vejîya û hêvîyî şikiyayî. Warê ma hetê hêzanê biçekan ra ameyî îşxalkerdene û talan û dizdîye dest pêkerd. 2-3 serî wina dewam kerd dima ra îşxalê DAÎŞî destpêkerd. No semedê cinîyan darbeyêka pîle bî. Cinîyî ameyî qetilkerdene, bazaran de ameyî rotene, keyeyan de ameyî qefilnayene, yerimanê sîyayan rê ameyî mecbur kerdêne. Cinîyî raştê tecawuzî ameyî û emîranê DAÎŞî rê bîyî kole. Reqa bîye merkezê DAÎŞî. Tîya dejê zaf pîlî ameyî antene. Cinîyê êzîdî tîya ameyî rotene. Tebqa, Minbic û Reqa de ciîyan eynî dejî antî. Ma hinî hêvîya xo ya xelisîyayîşî vînî kerdbî la bi Şorişê Kobanê ma hêvîya ma newe ra bîye zergûne.

Bitaybetî şerkerdiş û serkewtişê şervananê YPJyî yê vera çeteyanê DAÎŞî cinîyan ê herême ser o senî tesîr kerd?

Badê xelisnayîşê Kobanê û Girê Sipî û pîlbîyayîşê YPG û YPJyî kênayê ma yê ciwanî zî seba ke xo nê zulmî ra bixelisnê tewrê YPJyî bîyî. Zafê nê kenayan semedê xelisnayîşê herêma xo şehîd bîyî. Dima ke hetê  YPG û YPJyî her yew war ame azadkerdene û hêvîya ma ya azadîye zî zedêr bîye. Her roje bedilnayîşê tarîxî qewimîyayêne. Cinîyan hinî dezgehanê îdarekerdişî xeylêk waran ê bînan girewtêne ke no semedê cinîyan serkewtişo zaf pîl bi. Hinî komel de rengê cinîyan eysayêne.

Yewîya Cinîyan a Zenobîya senî ameye ronayene û manaya ci yo taybet esto?

Xora dezgehê cinîyan ê ke tîya ameyî ronayene wina bi xo nêameyî ronayene. Ma badê ronayîşê Kongra Starî cinîyê Cizîre xo rê sey nimûne girewtî, sey serkêş qebul kerdî. Ma zî herêmana xo de dezgehê cinîyan akerdî ke komel de bîyî merkezê çareserî. Dezgehê verî cîya cîya bî. Badê çar serran ma binê serbanê Yewîya Cinîyan a Zenobîya de heme dezgehî ardî têhet. Zenobîya her hetî ra rêxistinbîyayîşê cinîyan hedef gena. Zenobîya nameyê qiralîçaya Titmur o ke verê zulmî milê xo çewt nêkena û semedê cinîyan têkoşîn kena. Zenobîya nika semedê rêxstinkerdişê cinîyan ê Reqa, Tebqa, Minbic û Dêra Zorî gurîyena. Hedefê ci zî xebatanê xo heme Sûrîye rê vila bikero. Reqa, Tebqa, Minbic û Dêra Zorî de çar buroyê ci estê.  Nê çar buroyî hetê heyetê îdareyî ke tede 7 kesî ca genê ra yenê îdarekerdene. 11 komîteyê estê. Komîteyê Ekonomî, perwerde, çapemenîye, îdeolojî, pawitiş, keyeyê şehîdan û sulhî komîteyê aktîf ê. Ma do komîteya kulturî ronê. Her yew rengê logoyê Zenobîya yew şarî temsîl keno. Reyna sey kurdkî, erebkî û suryankî ame nuştene.

Badê ronayîşê yewîyî heme waran de kombîyayîşî ameyî kerdene. Cinîyan zaf paştî daye nê projeyî. Ma wazenê meclîsêk zî abikerê. Zenobîya yew merkezo ke heme cinîyî xo tede vînenî. Komel de heme zîhnîyetê DAÎŞî esto ke zor zî dano ma. Binê nameyê eşîran de tay orf edetî zor danê ma. Ma wazenê bi rayîrê perwerdeyî komelî bibedilnê. Her hetî ra ma do têkoşînî rê dewam bikerê.