8’ê Adare 2015 de şerwana enternasyonalîste Îvana Hoffmane bajarê Tîl Temirî yê Rojawanî de şerê verê DAÎŞ’î de şehîd bîbî. Festîvala 5’ine ya seba vîrardişê Hoffmane ameye viraştene.

Festîvale bi slogana ’Duîsburgî ra heta Rojawanî biciwîyo têkoşîno antî-faşîst’ ameye viraştene.

Festîvale vizêrî bi panelêk ameye destpêkerdene. Ewro zî saete 13.00 de vernîya Garê Trêne yê Duîsburgî de rayraşîyayîşêk ame kerdene.

Polîsanê Almanan cehd kerd ke flamayanê YPG û YPJ’î arê bidê la girseyî destûr nêda polîsan.

Festîvale de, saete 15.00 de grubanê Afrîkayijan, Almanyayijan û Kurdistanijan sehne girewt.

Qiseykerdişan de bale ame antene bi serê têkoşînê Îvana Hoffmane û hevalanê ci.

Dimayê qiseykerdişan Agirê Jiyan, Thawra, Zeynîk û Dûo Aryemîsa vejîyayî sehne.