Endama Fermandarîya Pêroyî ya YPJ-QSDyî Sozdare Dêrik Konferansê YPJyî yo çarin ANFyî rê ercna.

Sozdare Dêrik vist vîrî ke înan mabênê 30ê hezîrane û 2yê temmuze de konferansê xo kerdo û vat: ''Ma konferansê xo yo yewin 2013 de, oyo diyîn 2019 de û oyo hîrêyîn zî 2022 de kerdbî. Ma konferansê xo sere de Rayber Apoyî dîyarîya şehîdan, cinîyan û pêro dadîyan kerd. Ma sey YPJyî hêverî sey hêzêkê çekdarî xo rêxistin kerd. Ma armanc kerdbî ke vera hêrişanê serê Rojawanî şar û erdê xo bipawê. Ma bi nê hawayî serkêşîya Şorişê Rojawanî yê 19ê Temmuze kerd. Coka Şorişê Rojawanî şorişê cinîyan o. Şîarê konferansê ma yê çarinî 'Bi hêzê cinîya azade ma do şorişê cinîyan û welatê xo bipawê, azadîya Rayber Apoyî bîyarê ca' bi. Konferansê ma hîrê rojan dewam kerd û cinîyî bi xurtî beşdarê ci bîyî. 

Pêro beşdaranê konferansê ma nîqa, pêşnîyazê xo û fikrê xo pêşkêş kerdî.Ma nika prosesê hêrişanê çetinan de yê. Coka ercnayîş û dîyarkerdişê perspektîfê nê prosesî girîng bîyî. Girîng o ma vera pêro hêrişan xo bipawê, vera hêrişan rêxistinkerde û bihêz bibê. Ma nê erdî de vera terorîzmî xo ver danê la ma sey 'terorîstan' yenê pênasekerdene. Ganî rayaumûmîya dinya vera ney hişyar bibê. Ma sey cinîyan vera hêrişan û komanê terorîstan rêxistinîya xo awan kerde û do tim vera nînan têkoşîn bikerê. Çunke no erd erdê şaranê ma yo. Ganî ma sey şar û cinîyan teyna bi xo bawer bikerê. Ma sey YPJyî kenê ke erjanê şorişî bipawê. Ma do qesasê şehîdanê xo bigêrê, erdê xo yê îşxalkerdeyî azad bikerê. Konferansê ma nê armancî girewtî û ercnayîşî kerdî.

Konferansê ma de bire dîyaye ke ma newe ra YPJyî awan bikerê. Ma mîyanê şerêkê emrdergî de yê ke teyna bi çekan nêno kerdene. Coka ganî ma îdeolojî, felsefe û kulturê xo aver berê. Ma do dewrê neweyî de hîna giranîye bidê perwerdeyan û cinîyan hîna hişyar û rêxistinkerde bikerê. Xora ma do xo hetê leşkerîyî ra zî aver berê û artêşbîyayîşê xo xurtêr bikerê. 

Konferansê ma de derheqê rêxistinîya cinîyan de zî planî ameyî viraştene. Ma armanc kenê ke vera pêro hêrişan erd û şarê xo bipawê. Wextê verê ma de zî ma do vera qet yew hêrişê serê erd û şarê ma bêveng nêmanê. Ma teyna bi şarê xo bawer bikerê bes o. Komelo ke bi îdeolojîya neteweya demokratîke xo rêxistin keno do tim raştê hêrişanê sermayedar, îqtîdaran û dewletanê neteweyîyan bêro. Vera ney têkoşîn û tewirê ma do zelal bibê. Ma do nêverdê ke îradeyê şaran bêro rijnayene. Ma sey YPJyî weçînayîşê xo kerd. Sey YPJyî ma do seba nê erd û şarî tim xoverdayîş û xebatanê xo rê dewam bikerê.''