Têgêrayîşê Cinîyan ê Azadan (TJA) startê çalakîyan 8ê Adare Roja Cinîyan ê Kedkeran a Dinya Kerboranê Mêrdînî, memleketê Garîbe Gezera ke zîndan de ameye qetilkerdene de daye. Vervatoxa HDPyî Ebru Guneş û wekîlî Pero Dundar, Nûrane Îmîr, Feleknas Uca tewrê aktîvîte bîyî. Aktîvîteya ke bajaranê bînan ê Kurdîstanî ra cinîyî bi kincanê xo yê netewîyan tewrê ci bîyî de maya Gezere Halîme Gezer û wayê Gezerî zî tewrê ci bîyî. Cinîyan fotografê Denîze Poyraz û Garîbe Gezer û dovîzê sey ''Dem demê azadîya cinîyan o'', ''Xoverdayîşê Garîbe xoverdayîşê heme cinîyan ê dînya yo'' kiriştî û bi slogananê ''Cinî cuye azadîye'' û ''Wa biciwîyo xoverdayîşê cinîyan'' qîrayî. Dayîka Garîbe Gezer vat '' No veyveyê Garîbe yo'' û cinîyî selam kerdî.

Vervatoxa TJA ya Mêrdînî Eyleme Amak bi nameyê cinîyan qisey kerd. Amake vat: ''Serra 2021î de seba ke têkoşînê cinîyan bi ters û xofê îqtîdarî  polîtîkayê qirkerdişî yê vera cinîyan resayî merhaleya wehşetî. Sîstemanê camêrdan pê heme polîtîkayanê xo yê leymin û zexitnan hêrişê ercanê komelkîyan ê cinîyan kerd. Cinîyê têkoşêrî do peynîya îqtîdarê AKP-MHPyî bîyarê. Cinîyê kurdan ê ke hedefê polîtîkayanê şerê taybetî de yê do hesabê heme hêrişan bipersê. Îqtîdaro ke têkoşînê cinîyan ra terseno şexsê Ayşe Gokhan de bi seyan embazê ma destbend kerdî û tepiştî. Wazenê ke TJA qedexe bikerê û verê têkoşînê ma bîgêrê.  Vera cinîyan ê kurdan polîtîkaya dişmenîye yena rayraberdene. Seba ke zîndanan ra cenazayê domananê mevejîyê dayîke bi rojan o nobete tepişene. Ma cinîyî vera polîtîkaya çînkerdiş û înkarî têkoşîn kenê. Seba ke meseleya kurdî bi rayîrê demokratîkî bêro çareserkerdene ganî tecrîdê serê birêz Ocalanî bêro wedaritene. Paradîgmaya xelisnayîşê cinîyan a birêz Ocalanî vera îqtîdarî yo ke keno ke meseleya kurdî bi înkar û qedexeyan çareser bikero, cewabêko bitesrî o. Ma sey cinîyan ê aktîvîstan heme çalakîyanê xo de semedê azadîya birêz Ocalanî qîrenî. Ma do bi têkoşînî tecrîdî bişiknê.''

Dima ra Pero Dundar qisey kerd. Dundare bale ante xoverdayîşê cinîyan ser û vat: ''Dewlete heme plananê xo yê leyminan cinîyan ser o ano caardene.  Cinîyî yenê qetilkerdene û kiştoxê cinîyan teber de serbest gêrenê. Cinîyî rixmê heme zextan têkoşînê xo ra peyser game nêerzenê. Rewşa girane ya xoza û komelî pabesteyê tecrîdê serê Abdullah Ocalanî ya. Dem bedilîyeno, îqtîdarî bedilîyenê la qirkerdişê vera cinîyan nêqedîyenê. Tecrîd yeno manaya çaresernêkerdişê meseleya kurdî. Tecrîd şerê mabênê Rûsya Ukrayna yo.  Operasyonê Başûrî zî pabesteyê tecîrîdî yê. Mabenê Rûsya Ukrayna de şer esto la Rojawan yeno bombardumankerdene. Şarê kurdî tim eşkera vera şerî yo. Ma sey têgêrayîşê cinîyan ê kurdan vera şerê Rûsya Ukrayna yê. Şer cuya qir keno û komelî rê dano vînî kerdene. Ma do semedê heqanê xo têkoşînî rê dewam bikerê.''