Cinîyê Swîsreyijş  reya yewine bi waştişê têduştîya heqan 14’ê Hezîrana 1991’î de grevê neteweyî viraştibi. Dimayê 28 serran cinîyê Swîsijî reyna bi waştişê têduştîye, azadîye û edaletî kewtî grev. Çarçewaya grevê cinîyan ê neteweyî de bi serkêşîya sendîka û rêxistinanê cinîyan bi se hezaran cinîyan kar caverda û vejîyayî wareyan.

Caardişanê Cîyakerdişan Biqedênê

Teberê partîya rastgir a merkezê UDC’yî heme partî û rêxistinanê cimatê sîvîlî paştdayîş da grevê cinîyan. Grevê cinîyan çapemenîya Swîsre û dinya de bi rojdem. Cinîyan bi slogana “Zêdetir rêzdarî, zêdetir dem, zêdetir meaş” kar caverda û saetanê serê şodirî de tewrê çalakîyan bîyî. Zafaneyê cinîyan saete 15:24 de kar caverda û tewrê grevî bîyî.

Eke Cinîyî  Vinderê Dinya Vindena

Çarçewaya grevî de temamê roje  de çalakîyî ameyî viraştene û şewe zî heme bajaranê Swîsre de bi hezaran cinîyî rayraşîyayîş viraşt. Parlamenterê cinîyê ke sewîyeya neteweyî û kantonal de wezîfe kenê tewrê rayraşîyayîşî bîyî û rayraşîyayîşê se hezaran cinîyan de slogananê “Karo têduşt, meaşo têduşt”, “Eke cinîyî ke vinderê dinya vindena”, “Grev, grev, grev femînîst”, “Dewleta polîsî, eserê bapîrîyî yo”,  “Ne bapîrîye ne zî sînor”,  “Tek çare xoverdayîş o” û “Wa cinîyê dinya bibê yew” ameyî qîrîyayene.

Selahîyetdarî Ameyî Hîşyarkerdene

Cinîyan bi pankart û dovîzan bale ante serê waştişanê xo. Cinîyan bi vatişê, “Bêtêduştîye, politîkayê zayendî û şîdetê vera cinîyan rê Êdî bes o” vera caardişanê cîyakerdişan vengdayîşê mîyanê têgêrayîşkewtişî selahîyetdaran rê kerd. Rayraşîyayîşî de vera polîtîkayanê papîrî, neolîberal û kapîtalîstî hêrsêk ê girdî yê cinîyan estbi û eynî wext de bê mabên slogana “Cinîyan ney, sîstem û cimatî bivurnayê” ameye qîrayîyene.

Cinîyê Kurdistanijî: Xoverdayîş Azad Keno

Rêxistinanê cinîyan ê koçberan zî paştdayîş da rayraşîyayîşî û cinîyê Kurdan zî bi hawayêkê xo tewrê rayraşîyayîşî bîyî. Mîtîngo ke dimayê rayraşîyayîşî ame viraştene de cinîyanê Kurdî qisey kerd û bale ante serê têkoşînê azadîye yê cinîyanê Kurdî  û peyanê “Xoverdayîş azad keno”da.

Çarçewaya Grevê Cinîyan ê Neteweyî yo ke bi rojdemê welatî û Ewropa, heme bajaran de rayraşîyayîşî ameyî viraştene, rayraşîyayîşê tewr sixletî paytextê Bernî de û bajaranê Cenevre, Lozan, Basel û Zurîhî de bîyî. Goreyê doneyê ke polîsanê Swîsî weşanayê humara kesanê tayê bajaran ke tewrê rayraşîyayîşî bîyê wina ya: Zurîh 70 hezarî, Bern 40-50 hezarî, Basel 40 hezarî, kantona Tessîn 40 hezarî, Cenevre 15 hezarî, Delemont 5 hezarî û Frîbourg 5 hezarî.