Wekîla HDPyî ya Agirî Dîlane Dîrayet Taşdemîr derheqê wedaritişê Peymana Îstanbulî de ANFyî rê qisey kerd.

Taşdemîre pare kerd ke ê do qetî na bire qebul nêkenê û wina dewam kerd: ''Îqtîdar wazeno pêro hêzanê ke vera ci vejîyenê tasfîye bikerê. Cinîyî zî nê hêzan ra yew ê. Cinîyî wextêkê dergî ra nata vera îqtîdarî xo ver danê û ganî no xoverdayîş pêro pawitene. AKPyî şewêke nişka ra Peymana Îstanbulî fesh kerde. La şîdetê vera cinîyan her roje zêdîyeno.''

Taşdemîre bale ante hêrişanê vera hemserekîye û dezgehanê ke hedefê qeyûman de yê ser û vat: ''Welat de nika hetê îqtîdarî ra prosesê restorasyonî esto. Coka ê wazenê cinîyan tasfîye bikerê. Têkoşînê cinîyan azadîwaştox, demokratîk û eşkera yo. Eke cayêk de xeta azadîye ya cinîyan estba rejîmêko otorîter nêeşkeno xo serwer bikero. Îqtîdar wazeno cinîya meqbûle awan bikero. Coka têkoşînê cinîyan hedef keno.''

Taşdemîre da zanayene ke îqtîdar seba ke nêrazîbîyayîşanê vera wedaritişê Peymana Îstanbulî kêm bikero qala 'Peymana Anqara' keno. Taşdemîre vat: ''Mabênê Peymana Îstanbulî û Peymana Anqara de çi ferq esto? Kamyew madeya Peymana Îstanbulî ê acîz kerdê? Seba ma Peymana Îstanbulî raştîya xo pawena. Ma do seba aktîfkerdiş û caardişê Peymana Îstanbulî têkoşînê xo rê dewam bikerê.''

Taşdemîre bale ante hêrişanê vera HDPyî û vat: ''Partîya ma warê demokrasî û têkoşînê cinîyan de warêko cidî akerd. Partîya ma sîstemê hemserekîye awan kerd û temsîlîya têdûşte zêdînaye. Nê semedan ra zî partîya ma bena hedef. Coka ma do seba Peymana Îstanbulî û vera dewaya qefilnayîşî têkoşînêkê hemparî bikerê.''