Têgêrayîşê Cinîyan ê Azadan (TJA), Komeleya Paştdayîş û Hetkarîya bi Keyeyanê ke Merdimê Xo Vînî Kerdî ya Anatolia (ANYAKAY-DER) û Komeleya Paştdayîşê bi Hukmwerdeyan û Tepişteyan a Ege (EGE TUHAYDER) verê Zîndanê Şakranî de bale ante rewşa cinîyan ê tepişteyan ser û tecrîdê Îmraliyî bi eşkerayîyêke protesto kerd.

Eşkerayîye de sloganê sey ''Biciwîyo xoverdayîşê zîndanan'' û ''Aysele Tugluk rê Azadîye'' ameyî vatene. Wekîla HDPyî Serpîle Kemalbay û Mayê Haştîye zî çalakîye de amade bîyî.

Îdarekara EGE TUHAYDERî Leyla Kaygisiz eşkerayîye wende.

Kaygisize da zanayene ke zîndanan de cinîyî maruzê şîdet, îşkence, tacîz û tecwuzî manenê û vist vîrî ke tehqîqatê vera mergê Garîbe Gezer bi xîretê dozgerîye yeno qefilnayene. Kaygisize vat: ''Ma wayîrê xoverdayîşê Gezere vejîyenê û cinîya azade û komelê azadî pawenê. Zîndanan de tedawîya nêweşan yena astengkerdene. Sere de Aysele Tugluk ganî pêro tepişteyê nêweşî cade bêrê veradayene. Ma do 8ê Adare Roja Cinîyan de bibê vengê pêro tepişteyan. Ma wazenê ke cade tecrîdê Îmraliyî bêro wedaritene.''

Serpîle Kemalbay zî ard ziwan ke Tirkîya vurîyaya zîndanêkî û vat: ''Zîndanî bîyî cayê mergî. Zîndanî pirr ê. Ma venga dewleta ke her roje edaletî kişena danê ke wa tepişteyanê nêweşan û Dezgehê Tipê Edlîyî ra destê xo bigêra. Wa zîndanî veng bibê, tepişteyî azad bibê.''