Pakêta 6. ya muhakemekerdişî menga adare de Meclîs de do bêra nîqakerdene ke pakête derheqê heqê nafaka de ya. Wextêkî ra nata beşêkê camêrdan bi bahaneya 'nafakaya heta peynî ma mexdûr kena' propaganda keno. Erdoganî zî vatbi ''No mexdûrîyet do bêro çareserkerdene.''

Goreyê xeylêk cigêrayîşan nafakaya xizanîye cara tay a. Heta zafê cinîyî şîdet yan zî gefan ra sebeb tewr nêfikîyenê ke nafaka bikerê.

Ma qezaya Esenyaliyî ya Îstanbulî de cinîyan reyde najaka û verdayîşê mêrdeyî ser o qisey kerd. Na qeza qezayêka feqîr a. Cinîyî zanenê ke eke nafaka bigêrê zî nêeşkenê pê xo bidevirnê. Coka zêdêr mêrdeyê xo ver dayî zî xebitîyenê. La her cinîye nêeşkena karêkî bivîna.

Zafê camêrdî zî seba ke nafaka medê welayetê domana gênê xo ser la miqatbîyayîşê domanan reyna cinîyan rê verdenê.

Ayşe zî nê cinîyan ra yew a. Yewê/a ci astengdar 3 domanê Ayşe estê. Ayşe prosesê verdayîşî de rojê zehmetî antî û domana/ê ci ya astengdare/î rê hetê merdimanê waştîya babîyî ra hêrişo cînsî ame kerdene. La dewaya îstîsmarî de îstîsmarkerî vera dîyenê. Ayşe seba ke neçare ya 15 rojan de yew domanê/a xo ya astengdarî/e bera nêweşxane çew kar nêdano ci.

Ayşe vat: ''Babîyê ci vano do nafaka nêdo mi. O têna di domanê bînî wazeno. Wa nafaka nêdo ma la mi rê gefan zî mewano. Ez ey ra pere nêwazena.''

Ayla zî bedenê xo de rêçanê şîdetî kirişena û şîdetî ra nêeşkena rayîr a zî şora. Ayla vat: ''Mi dî reyî xîret kerd ke xo bikişa. Ez ya xo kişena yan zî mêrdeyî ver dena. Eke ez ey ver bida zî o do mi bikişo. Ez têna wazena ganê xo bixelisna. Sebîna çîyêkî nêwazena.''

Şîlane 30 serran ra pey mêrde ver dayo û pêro zewajê xo de şîdet dîyo. Şîlane vat: ''Ciwanîya xo de ez daymîşê ci bîyêne la hînî ez bîya kokime. Ez 60 serre ya. Kam kar dano mi? Yew meaşê min o kokimîye yan zî teqawutî çin o. Ey di reyî kerd ke mi kardî bikero. Tewr peyên zî ey e eşta teber. Cayêk çin o ez şora ci.''