Têgêrayîşê Cinîyan ê Azadan (TJA) Amed de bernameyê xo yê 8ê Adare Roja Cinîyan eşkera kerd. TJA do emser aktîvîte û çalakîyanê 8ê Adare bi şîarê 'Wextê wextê azadîya cinîyan o' bikera.

Vervatoxa Meclîsê Cinîyan ê HDPyî Ayşe Acar Başaran, Wekîlê HDPyî Remzîye Tosun, Gulîstane Aksoy, îdarekar û endamê Komeleya Cinîyan a Rosa û Meclîsê Mayanê Haştîye zî tewrê eşkerayîye bîyî.

Aktîvîsta TJA Neslîhane Acar eşkerayîye wende.

Acare îfade kerd ke 2021 de têkoşînê azadîye yê cinîyan bi hedefê hêrişan û îqtîdarî asta wehşetî de hêrişê cinîyan kerd. Acare vat: ''îqtîdarê AKP-MHPyî  hol zaneno ke cuye bi cinîyan ê azadan do azad biba û îqtîdarê ci biqedo coka hêrişê cinîyan keno. Ma sey cinîyan ê kurdan 8ê Adare de îradeyê xo bimojnê û cewabê nê hêrişan bidê.

Ziwanê ma yê dayîke yeno qedexekerdene û çin hesibîyeno. Ma do vera dişmenîya kurdkî û kurdan ziwanê xo her warî de bipawê. Îqtîdaro ke Peymana Îstanbulî wedarite qirkerdiş û cinîyetanê cinîyan ra mesuldar o. Cinîyî prosesê janê Korona de keyeyan de heps mendî, hîna zaf maruzê şîdetî mendî, hîna bîyî feqîr. Ma bi wesîleya 8ê Adare reyna anê ziwan ke keda cinîyan ganî mîyanê polîtîkayanê ekolojîk, komunal û azadîye de ca bigêra.

Têkoşînê ma her warî de vera hişmendîya serdestîya camêrdan beno pîl. Îqtîdaro ke TJA keno hedef, endamanê ma erzeno zîndanan wextê xo yê peyênî de yo û hînî bîyo temsîlkarê faşîzmî. Zîndanan de xoverdayîşê cinîyan dewam keno û zîndanî hînî bîyê cayê mergî. Mergê Garîbe Gezer û rewşa Aysele Tugluk dişmenîya îqtîdarî ya vera cinîyan ê kurdan eşkera kenê. Emîne Şenyaşar û dadîyê nobetanê edaletî yê Wan û Amedî sembolê xoverdayîşê cinîyan ê kurdan ê. Hişmendîya serdestîya camêrdan waşt ke pê qirkerdişê Denîze Poyraz mesaj bido. La ma vera polîtîkayanê înkar û îmha û bi hêrsê qirkerdişê Denîze Poyraz wayîrê têkoşînê aye vejîyenê.

Kurdîstan de seba ke cinîyê kurdî kultur, huner û tarîxê xo ra bêrê dûrîvistene polîtîkayê fuhuş û tîryakî yenê caardene. Reyna serebûtanê tacîz û tecwuzan de faîlê unîformakerdeyî bêceza yenê verdayene. Vera polîtîkayanê şerê taybetî têkoşîn do bêro pîlkerdene û dewamkerdene.

Ma reyna anê ziwan ke çareserîya meseleya kurdan de Birêz Ocalan muxatab o û wa cade ey reyde pêvînayîş bêro kerdene. Tecrîd meseleyan hîna giranêr keno û çareserîye bi azadîya Ocalanî mumkîn o. Ma sey cinîyan na babete de rêxistinkerde, wayîrê îsyanî, bawermend û qerardar ê.

Ma soz danê ke kombîyayîşanê xo zêde bikerê, mîyanê têkoşînê rûmetênî de cuya rûmetêne awan bikerê. Ma pêro embazanê cinîyanê ke têkoşînê azadîye de şehîd bîyî bi rêzdarî yad kenê. Ma do mîrasê înan pîl bikerê, paştdayîşê enternasyonelî yê cinîyan pîl bikerê, sîstemê camêrdan bin bikerê, cuya azade esas bigêrê. Nê esasî ser o ma venga pêro cinîyan danê ke 8ê Adare bi na bawerîye pêşwazî bikerê.''

TJA da zanayene ke startê bernameyê 8ê Adare 25ê sibate de cayê gorê Garîbe Gezer qezaya Kerboranî ya Mêrdînî de do bêro dayene û 8ê Adare de zî Amed, Êlih, Şirnex, Silopî, Wan û Dêrsim de nawnayîşî do bêrê kerdene.