Têgêrayîşê Cinîyan ê Azadan (TJA) 8ê Adare Roja Cinîyan a Dinya  ke do pê şîarê ''Ma Vera Qirkerdişê Cinîyan Cuye, Vera Tecrîdî Azadîye Pawene'' do bêro kerdene, startê ci Sêrt û Şirnex  de da.  

Sêrt

Çalakîya ke verê banê HDPyî de ameye kerdene atkîvîstê TJA wekîl û îdarekarê HDPyî , endam û îdarekarê Komeleya Cinîyan a Rosa û xeylêk cinîyî tewrê ci bîyî. Seba ke polîsan waşt verê eşkerayîye bigerê cinîyan ablûqaya polîsan pê tîlîlîyan protesto kerd.  Dima ra binê ablûqa eşekrayîye ameye dayene.

Serekwekîka Grûba HDPyî Merale Deniş Beştaşa ke tîya qisey kerd ablûqaya polîsan sey 'tabloyê şerm' name kerd û vat: ''Destkewteyê cinîyan yenê hedefkerdene la ê do vera xoverdayîşê cinîyan çirey ser mekewê.'' Beştaşe vist vîrî ke 107 zîndanan de bi hezaran tepişteyî vera îşkeceyê tecrîdî grevê vêşanîye de yê û vat: ''Ma cinîyî vera heme metodanê îşkenceyî senî ke xo pawenê ma vera tecrîdî zî azadîye pawenê.''

Aktîvîsta TJA Şîlane Kan zî vat: ''Pê qirkerdişanê vera cinîyan yeno waştene ke cinî bibe bêîrade û meeşke xo bipawe ke azadîya ci destê ci ra bêro girewtene. Ma raştê tacîz, tecawuz qirkerdişî û îşkeceyî yenê. Feqîrîye de rî bi rî manenê. Yenê tepiştene. Karê ke ma keda pîle daye ci bi KHKyan ma tira yenê îxraçkerdene. Cinîyî her roje yenê kiştenê û camêrdê qetilkarî bêcaza yenê verdayene. Cinîyê ke wazenê xo bipawê  hukmê camêrdî cezaya tewr pîle dano înan. Cinîyan semedê vergirewtişê qirkerdişan verê xo da Jineolojî. Xoverdayîşê Sarayan û Sevêyan bi sebebê ronayîşê cuyêka newîye. Ewro seba ke îradeyê kurdan yeno tecrîdkerdene heme cinî û komel binê tecrîd de yê. Bi polîtîkaya tecrîdî wazenê cinîya bêfikir û bêîrade biafernê.  La cinîyê xoverdayoxî destûrê înan nêdanê. Senî ke Leyla Guvene û Ayşe Gokkane vat, 'teber û zere ferq nêkenê ma do bi xoverdayîşê mucaleyê xo rê dewam bikerê' û ma vanê ma kurd ê, cinî yê, tîya yê.''

Badê eşkerayîye cinîyan bi slogananê xoverdayîşî govend girewt.

Hezex

Reyna qezaya Hezexî ya Şirnexî de zî startê çalakîyan ê 8ê Adare ame dayene. Cinîyê ke verê banê HDPyî yê Hezexî de ameyî têhet bi nameyê înan Hemsereka HDPyî ya Elkê Bebune Aslan eşkerayîye wende. Aslane veng da ke wa heme cinîyî  cayo ke tede yê biaçarnê cayê çalakîye û vat: ''Ma do xoverdayîşî pîl bikerê û wayîrê destkewteyanê xo vejîyê.''

 Dima Wekîla HDPyî Gulîstane Kiliç Koçyîgît qisey kerd. Koçyîgîte îqtîdarê AKPyî se dişmenê cinîyan name kerde û vat: ''Cînîyî do azadîye û demokrasîyî bîyarê nê welatî.'' Koçyîgîte bale ante grevê vêşanîye ke vera tecrîdê serê Rayberê Şarê Kurdî Abdullah Ocalanî yena domnayene ser û vat: ''Heqê tepişteyanê sîyasîyan yenê binpaykerdene û zereyê zîndan de zîndan ciwîyenê. Îqtîdarî ma kerdî hedef. Seba ke ma cigêrayîşo rût ard rojdem ma sey bêeheqleq û bêanor îlan kerdî. Vera înan ma do mucadele bikerê. Ma do heqanê cinîyan bipawê.''

 
Programê 8ê Adare

Badê eşkerayîye programê 8ê Adere wina ame rêzkerdene:

8ê Adare Kurdîstan û Tirkîya de do pê çalakîyanê biheybetan bêro fîrazkerdene.

Tirkîya de ma do 8ê Adare pîya bi dezgeh û plarformanê cinîyan bikerê.

Bajaranê Amed û Wanî de ma do di mîtînganê girdan bikerê.

Çalakîyê ke do 1ê adare de  bêrê destpêkerdene de heme bajaran de do vilawekî, vilîkî bêrê vilakerdene û sînevîzyon, panel û semînerî bêrê kerdene.

8ê Adere de do bi çalakî û aktîvîteyan fînalê 8ê Adare bêro kerdene.

.