Têgêrayîşê Cinîyan ê Kurdan ê Fransa (TJK-F) û Konseya Kurdan ê Demokratîkan a Fransa (CDK-F) derheqê qirkerdişê Parisî de eşkerayîyêka nuştekîye weşanaye.

''Paris de 9ê çeleyê 2013î de ronayoxanê PKKyî ra Sakîne Cansiz ((Sara), Temsîlkara KNKyî ya Parisî Fîdane Dogan (Rojbîne) û Endama Têgêrayîşê Ciwanan ê Kurdan Leyla Şaylemez (Ronahî) bi barbarî ameybî qetilkerdene. Rixmo ke qirkerdişî ser ra 9 serrî derbaz bîyî hema zî edalet nêame caardene.

Dima vejîy werte de qirkerdiş hetê MÎTî ra amebi kerdene. La dewleta Fransa bi bahenya 'kiştox merdo, dewa qefilîyaya' ver vejîyaye. HPGyî Operasyonê Şorişgêrî yê Sakîne Cansiz de 2 endamê MÎTî tepiştbî û înan îtîraf kerdbî ke hayîya Erdoganî pê nê operasyonî esta. Dima Belçîka derheqê qirkerdişî de dewa akerde û eşkera bi ke Sersefîrê ê çaxî yê Parisî Îsmaîl Hakkii Musa zî tede xeylêk kesî mîyanê organîzasyonê nê qirkerdişî de yê.

Seba ke rojanê verê ma de edalet bêro caardene emser dezgehê Kurdîstanî do pê şîarê 'Heta ke edalet tarîye de bimano Fransa sûcdar a' sere de Paris pêro cayan de seba Sakîne Cansiz, Fîdane Dogan û Leyla Şaylemez meydanan de bibê.

Seba ke hesabê qirkerdişî bêro persayene 8ê çeleyî de saete 12.00 de Gare Du Nordî ra heta Meydanê Rebuplique çalakîya rayraşîyayîşî do bêra kerdene. Kesê ke 9 serrî yo nêwazenê cigêrayîşê edaletî yê kurdan û keyeyan bivînê ma reyna venga înan danê.

-Erdogano ke fermanê qirkerdişî dayo, wa bêro muhakemekerdene!

-Wa qirkerdiş tarîtîye de nêro verdayene!

-Nêbeno ke menfaatê ekonomîkî û sîyasî verê edaletî de bibê û heta ke no qirkerdiş nêro zelalkerdene şima zî do sûcdar bibê.

Çalakîyê protestoyî:

5ê çeleyî de saete 11.00 de Merkezê Komelê Demokratîkî yê Kurdan ê Parisî ra heta Buroyê Enformasyonî yê Kurdîstanî bi nameyê Rayraşîyayîşê Edalet û Heqîqatî çalakîye do bêra kerdene.

8ê çeleyî de saete 12.00 de bi şîarê ''Heta ke edalet tarîtîye de bimano Fransa sûcdar a'' Gare Du Nord Republique de rayraşîyayîş do bêro kerdene û nawnayîş do bêro kerdene.

9ê çeleyî de saete 12.30 de verê Buroyê Enformasyonî yê Kurdîstanî de Rue Lafayette de çalakîya yadkerdişî do bêra kerdene.''