Cinîyî bi wesîleya 8ê Adare Roja Cinîyan ê Kedkaran a Dinya xeylêk şaristanan de vejîyayî meydanan û înan mesajê 'Cinîyî do azadîye bîyarê' da, tecrîdê Îmraliyî protesto kerd.

Êlih

Êlih de zî cinîyan rixmê astengî û gefanê polîsan 8ê Adare fîraz kerd. Polîsan waşt rayraşîyayîşê cinîyan asteng bikerê. Mayê Haştîye, Wekîle Feleknas Uca û Hemşaredara Êlihî Songul Korkmaza ke herinda ci de qeyûm amebi tayînkerdene zî tede xeylêk cinîyî pê slogan û dowîzan ver bi bînaya HDPyî şîyî. Dima Feleknase Uca qisey kerd û vat: ''Ma înan ra nêtersenê û ma do têkoşînê xo berz bikerê.''

Çewlîg

Rêxistina HDPyî ya Çewlîgî  bînaya xo de şayîyêke kerde û dima zî cinîyan rê qeranfîlî vila kerdî. Cinîyan şayîye de sloganê 'Cinîye, Cuye, Azadîye' berz kerdî. Endama Meclîsê Cinîyan Îlknure Bîrol pare kerd ke HDP partîya cinîyan a û azadî û hêvîya cinîyan ana ca. Cinîyan dima merkezê şaristanî de cinîyan rê qeranfîlî vila kerdî.

Şirnex

Qezaya Elkê ya Şirnexî de cinîyan rayberîya TJA û Meclîsê Cinîyan ê HDPyî de bînaya HDPyî de 8ê Adare pê şayîyêke fîraz kerd. Şayîye de pankarta 'Ma vera qirkerdişê cinîyan cuye û vera tecrîdî azadîye pawenê' ameye daliqnayene. Hemsereka HDPyî ya Elkê Beybûne Aslan û aktîvîsta TJA Emîne Înan şayîye de qisey kerd û pare kerd ke ê do tecrîdê Îmraliyî bişiknê û azadîye bîyarê. Şayîye pê sloganê 'Cinîye, Cuye, Azadîye' qedîyaye.

Riha

Meclîsê Cinîyan ê HDPyî yê Riha û TJA Xelilîye de şayîyêke kerde. Wekîla HDPyî ya Riha Ayşe Surucu, Mayê Haştîye û xeylêk cinîyî tewrê şayîye bîyî. Şayîye de pankarta 'Gulîstane Doku ça de ya' ameye daliqnayene. Ayşe Surucu şayîye de qisey kerd û ard ziwan ke cinîyî do vera şîdetî û hêrişan sereyê xo nêarê war û sîstemê hemserekîye bipawê.'' Şayîye pê govendan qedîyaye.

Semsûr

Platforma Cinîyan bînaya KESKî de eşkerayîye daye çapemenîye. Nametê platformî ser o Eyleme Yildirim eşkerayîye daye û ard ziwan ke polîtîkaya bêcezaverdayîşî  şîdet zêdînena.

Mêrdîn

TJA, Meclîsê Cinîyan ê HDPyî yê Mêrdînî û Platformê Cinîyan ê Şahmarane verê bînaya HDPyî de 8ê Adare fîraz kerd. Cinîyan pê erbaneyan govend girewt. Şayîye de Wekîla HDPyî Pero Dundare vat: ''M vera şîdet û qirkerdişê cinîyan têkoşîn kenê. Ma do her roje sey 8ê Adare têkoşîn bikerê.'' Şayîye pê tilîlîlî û govendan qedîyaye.

Hetê bînî ra Osmanîye û Hatay de zî rayberîya HDP û TJA de cinîyan ê kurdan pê şayî û eşkerayîyan 8ê Adare fîraz kerd.