Temsîlkara Merkezê Heqanê Cinîyan ê Baroyê Amedî Avûkate Çigdeme Sevimli ANFyî rê têkoşînê cinîyan ercna, vat têkoşînê cinîyan ê kurdan çend xurt bi şîdetê îqtîdarî zî vera înan zêdîya.

Çigdeme Sevimli vat: ''Tarîxî ra nata tim warê camêrdan estê. Heme serûberî goreyê camêrdan yenê kerdene. Cinîyan semedê cuyeyêka seyciye û heqê xo dest pê têkoînî kerd. Camêrdî seba ke warê înanê ke ê tede serdestê meşîyê we hêrişê cinîyan kenê. Têkoşînê cinîyan çend xurt beno zextê îqtîdaran zî vera nê zêdîyenê. Têna Tirkîya de nê heme dinya de no wîna yo. Têkoşînê cinîyan her ca de pede pede vila beno.Têgêrayîşê cinîyan ê kurdan verî dest pê têkoşînê nasnameyê neteweyî kerd la dima ra pê perspektîvê cinîya azade têkoşînê xo hîra kerd. Cinîyê kurdan seba ke hem cinî hem zî kurd ê, dilab têkoşîn kenê, û dewlete înan rê dilab-hîrlab hêriş kena. Kurdîstan de hem şîdetê vera cinîyan û hem şîdetê vera nasnameyê kurdan esto. Têkoşînê cinîyan ê kurdan çend xurt beno, îqtîdar nê sey tehlukeyî vîneno û hêriş keno.''

Sevimli vist vîrî ke cinîyê sey Ayşe Gokkan, Aysele Tugluk û cinîyê bînî yê ke sey sembolê têgêrayîşê cinîyan ê kurdan yenê zanayene raştê hêrişê dewlete yenê û vat: ''Nê hêrişî vera têkoşînê cinîyan ê kurdan yenê kerdene. Ma zanê ke Aysele Tugluk sey sîmgeyê hemserekîye yena naskerdene. A hemsereka verêne bî. Pê destê qeyûman dezgehanê cinîyan rê hêrişî ameyî kerdene. Kurdîstan de zextê vera cinîyan pabesteyê têkoşînê kurdan ê.

Hetê bînî ra cinîyê ke hema binê zextê mêrde, babî û bira û komelî de ciwîyenê estê. Xora ganî ma heqê nê cinîyan bipawê la wina rehet nîyo ke ma înan warê zextî ra vejê. Coka cinîyê ke şîdet vînenî û nêzanê se bikerê, eke eşkenê keyeyî ra vejîyê, wa bêrê Baro. Pê telefon û hesabanê medayaya sanale wa xo biresnê ma. Eşkenê şirê dezgehanê cinîyan ê bînan zî. Reyna eşkenê ŞONİM ya zî xetê 183yî ra zî hetkarî bigerê. Cinîyê ke raştê şîdetî yenê eşkenê Baro ra paşdayîşê avûkatna bigerê û pîya bi domananê xo yê wirdîyan cayêmendişî peyda bikerê. Eşkenê xo binimnê û hetkarîya madî bigerê. Beno ke Tirkîya de semedê cinîyan rewşe zaf hole nîya la semedê nê îmkanan cinîyî ganî israr bikerê.''