Qezaya Dêrikî ya Mêrdînî de menga êlule de qoricîyan Yakup Akyol, Çetîn Tag, Suud Çelîkî û Harun Yilmazî wextêko derg bi şantajî cinîya 22 serre rê tecawuz kerdbî. Rixmê gerreyê cinîye zî Serdozgerîya Komare ya Dêrikî çar tecawuzkerî vera dayî. 

Platformê Cinîyan ê Şahmarane ra Gulîzare Îpek Bîlek derheqê babete de ANFyî rê qisey kerd.

Gulîzare da zanayene ke serebûtanê tacîz û tecawuzan ê Kurdîstanî de sûcdarî nênê cezakerdene û no yew metodê şerê taybetî yo. Gulîzare vat: ''Cinîyêka ciwane tecawuzo ke domanîye de ci rê ameyo kerdene, nêeşkaye rew qebul bikera la dima bire daye ke muracatê huqûqî bikera. La mehkeme goş da tecawuzkeran. No nêno qebulkerdene. Xîret yeno kerdene ke ameyoxê komelê ma, bi taybetî ê cinî û ciwanan bêro çinkerdene. Bi nê hawayî cinî û ciwanî teyna yenê verdayene û mîyanê komelî de bêhêvîdarîye yena vilakerdene. La ma do qetî rayîr nêdê ney.''

Gulîzare vist vîrî ke Şirnex de çawişêkê pisporî xîret kerd ke cinîyêka digane tacîz bikera û netîceya nêrazîbîyayîşê şarî de o ameyo destbendkerdene.

Gulîzare vat: ''Paştdayîşo komelkî û xopawitiş zaf girîng ê. Ganî ma nêzdîyê yewbînan bibê û vengê yewbînan bieşnawê. Serebûtê Şirnexî nimûneya ney a. Şarî cade mudaxeleyê serebûtî kerd, refleksê xopawitişî kewto dewre. Dêrik de tecawuzkeran cinîya mexdûre bi teynabîyayîşî tehdît kerda. Tecawuzkerî bi nê hawayî qelsîya komelî rê fayde kenê. Paradîgmaya ma azadî û yewîya cinîyan a. Seba ke ma ney bivisnê dewre her ca de ganî têkoşînî xurtêr bikerê.''