Wekîlanê cinîyan ê HDPyî derheqê şehadetê Garîbe Gezera ke Zîndanê Kandira de bi hewayêke şikdarî dinayaya xo bedilnayene û rewşa weşîya sîyasetmedare Aysele Tugluk de Meclîs de kombîyayîşê çapemenîye kerd.

Vervatoxa Meclîsê Cinîyan Ayşe Acar Başarana ke kombîyayîş de qisey kerd vist vîrî ke Tirkîya de demo peyên de qewimîyayîşê sey Zîndanê Amedî yê serranê 80yan benê û vat: ''Binpaykeridşê heqan her roje zêdîyenê û îqtîdar nê zextan nêvînayîşî ra yeno. Garîbe Gezer bado ke Zîndanê Bunyanî ra surgunê Zîndanê Kandira bîye tîya gerîyaye hucreyê yewkesan. Gezere seba ke vera naye vejîyayî çimeyê sungerin de ameyî tepiştene. Çimeyo sungerin sey caardişê Zîndanê Amedî yê serranê 80yan ewro yeno caardene. Goreyê vatişanê avûkat û merdimanê ci Gezer 24ê gulane de raştê îşkenceyê gardîyanan ameye û hêrişê cinsî rê rî bi rî mende. Gezere no rayapêroye reyde pare kerd û seba ke hucreyê yewkesan de memano muracat kerd la nê muracatî nêgerîyayî dest. 7ê hezîrene de waşt hucreyê xo bivêşno û verê ci cehd kerd ke xo bikişo.  Wekîlanê ma rê mektube nuşte û derheqê şertanê xo yê zehmetan qisey kerd. Nê mektûban ra tayî nêresayî destê ma, tay resayî. Semedê naye ma vernîyazî dayî meclîsî û îşkenceyê zîndanan kerd rojdem. Ma vat Garîbe Gezere zîndan de binê çimdarîya dewlete raştê îşkenceyî yena. Ma kerd ke meclîs, kuçe û her ca de bibê vengê Gezere la çi heyf ke îqtîdar û Wezîrîya Edaletî heme vengdayîşê ma bêcewab verdayî. Tewr peynî de Garîbe bi hewayêkê şikdarî dinyaya xo bedilnaye. Vanê aye xo kişto la keye û avûkatê ci vanê  aye xo nêkişte. Ma zî pê bawer nêkenê. Ma mergê cinîya ke bi hewayêkê sîstematîkî raştê îşkenceyî ameye sey xokiştişî qebul nêkenê.''

Başaranê bi ramojnayîşê fotografan bale ante bêhurmetîya vera cenaza ser û vat: ''Gama ke cenaza ameye girewtene polîsan şarî rê heqeret kerd. Cenaza Mêrdîn de bi saetan ameye pawitene û polîsan wesayîtê cenaza ya şaredarîye peyser açarna û vat 'wa keye bi îmkananê xo cenaza bêro.'  Dişmenîye nêqedîyena. Mergî zî zerrîya înan serdin nêkerd. Îqtîdar vera cenazayan zî dişmenîye keno. Êyê ke ewro wina hêriş û zext kenê wa hole bizanê ke ê do verê huqûqî de hesabê naye bidê. Destûr nêda şar şiro goristan. Nê zî qîm nêkerd vizêr şewe ra muftuyîye zextê keyeyî keno ke wa keyeyê tezîye veng bikero. Keyeyî kênaya xo binê çimdarîya dewlete de vînî kerde. Vera naye êyê ke ganî hesab bidê destûr nêdanê keyê sîya giredo û dejê xo pare bikero. Xora xebaranê medyaya îqtîdarî ra kiştox eşkera eyseno. Vanê 'zîndan de yewna terorîste merde.' No îtîrafê mergê Garîbe yo. Êyê ke bîyî sebebê mergê Garîbe do hesab bidê.''

Başarane rewşa tepişteyanê nêwaşan zî vist vîrî û vat: ''Ewro bi seyan tepişteyê nêweşî rîyê polîtîkayanê dişmenkî yê îqtîdarî ra zîndan de yê. Înan ra kesa ke tewr yena zanayene Aysele Tugluk a. Tugluke nika nêweşîya girane ravêrnena. Vîrê Aysele Tugluk ca de nîyo û a pê hetkarîya embazanê xo yê hucreyî eşkena hewcedarîyanê xo peyda bikera. Fakulteyê Tipî yê Kocaelî derheqê Tugluke de raporê ''nêeşkena zîndan de bimana'' dabi la semedo ke Dezgehê Tipê Edlîye (ATK) yê Îstanbulî bi tewripê politîkî senî ke semedê tepitşeyanê bînan de zî wina gerar geno, eqsê raporê Fakulteyê Tipî raporêk da Tugluke vera nêdîyena. Goreyê xebaranê peyênan ê ke ma embazanê Tugluke ra girewtî rewşa ci xirabêre bena.  Ma tîya ra rena veng danê: Na bêhuqûqîye  caverdê. Huqûqê  dişmenîye caverdê.  Aysele Tugluk bi serran nê welatî de semedê demokrasî û cinîyan  têkoşîn kerd. Aysel Tugluk wijdanê komelî ya. Tugluke û tepişteyanê nêweşan vera bidê. Ez veng dana heme cinîyan ma bibê vengê Aysele Tugluk û vera bêhuqûqîye têkoşînî pîlêr bikerê.''