Colemêrgî hetê cografîkî ra meymandarîye xeylêk kulturan kerda. Coka şaristan de kulturê werdî zî zaf zengîn o. Kutilsi, Tirşika Çeliya, Qiris, Hekerun, Sengeser, Çorti, Doleme, Gulul, Kepaye, Keledoş werdê namdarî yê şaristanî yê.

Besna Balikesîra ke Colemêrg de ciwîyena, 2 serrî yo werdo ke keyeyê xo de pewjena roşena û pê ameyeyê nê karî xo devirnena. Besna Balikesîr ard ziwan ke tewr zaf werdê Koftet Çeliya bale anceno û îfade kerd ke a wazeba wayîrê kulturê werdî yê Colemêrgî vejîya.

Besna Balikesîr pare kerd ke herêma Colemêrgî wayîra kulturêkê zengînî yê werdî ya û vat: ''Werdê Colemêrgî pê hûmaritişî nêqedîyenê. Ez têna nînan ra çend heban virazena û roşena. Ez wazena Koftet Çeliya bikera markayêka Colemêrgî. Eke îmkanê mi estbê wazeba menuyêkê hîna hîrayî amade bikera.

Krîzê ekonomîk û janî ra îmkanê karî kêmîyayî. Nika seba werdê keyeyî taleb zaf o. Ez pê karê xo karê cinîyanê ke xebitîyenê zî kêm kena. Çunke cinîyê ke xebitîyenê wext nêvînenê ke nan pewjê.''

Besna da zanayene ke a bi nê hawayî bucçeya keyeyî rê hetkarîye kena û vat: ''Krîzê ekonomîkî xora tesîrê ma zî kerd. Ez pê nê karî wazena bara mêrdeyê xo kêm bikera. Ez keyeyan û dezgehan rê werdanê xo şawena. Ez venga pêro cinîyan dana ke wa pê xo bawer bibê û tewrê berardişî bibê. Karê mi xeylêk cinîyan rê bi mîsal.''