Xalê Aysele Tugluk Suleyman Yukselî ard ziwan ke nêweşîya demansî ya Aysele Tugluke hende aver şîya ke a hînî nêeşkena avûkata xo zî bişinasa. Yukselî veng da ke wa Aysele Tugluk cade bêra veradayene.
Sîyasetmedara kurde û Aysele Tugluka ke 2016 ra nata Zîndanê Kandira de tepişîyena tede nêweşîya demansî est a. Rewşa Aysele Tugluk vera bena giranêr. Rixmê ney zî Aysele Tugluk bi raporê 'eşkena zîndan de bimana' yê Dezgehê Tipê Edlîyî (ATK) vera nêdîyena. Seba veradîyayîşê Aysele Tugluk xîret û vengdayîşî dewam kenê.
Xalê Aysele Tugluk Suleyman Yukselî derheqê babete de PÎRHA rê qisey kerd û ard ziwan ke Aysele Tugluk 'birêka sîyasîye' ser o tepişîyena.
Yukselî îfade kerd ke Aysele Tugluk hînî nêeşkena avûkata xo zî bişinasa û vat: ''Êyê ke vanê a eşkena zîndan de bimana nînan de wijdan çin o. Dizdî, tecawuzkerî û kiştoxî zîndanî ra vera dîyenê la sey Aysele merdimê ke haştîye û heqanê merdiman pawenê zîndan de yê. Aysele seba ke kurd û elewî ya zîndan de tepişîyena. Ê merdimê ke tede demans est ê ganî zîndan de nêtepişîyê la Aysele Tugluk vera nêdîyena.''
