Par 2-4ê teşrîna verêne de Endamê TKP/ML-TÎKKOyî Gokçe Kurban (Asmîn) û Alî Kemal Yildiz (Ozgur) Dêrsim de bombardumanê dewleta tirke de şehîd bibî û cenazayanê înan rê îşkence amebi kerdene.

Cinîyî vengdayîşê Cinîyan ê Demokratan ê Neweyan (YDK) ser o bînaya ÎHDyî ya Îstanbulî de amebî pêser.

Endama YDKyî Tuba Apaydin nameyê cinîyan ser o eşkerayîye kerde û vat: ''Teşhîs de dîya ke sereyê wird gerîlayan zî tira ameyî birnayene, bedenanê înan rê îşkence ame kerdene. Nê çîyî nîşanê polîtîkayê şerî yê û mabênê dişmenîya vera cinîyan û cergê DAÎŞî cîyatîye çin a. Îşkenceyê vera Ekîne Wan zî hema vîran de yo. Îşkenceyê vera cenazaya Gokçe Kurban hêrsê ma zêdînayî. Raporê otopsî zî ma ra yeno remnayene. Sere de cinîyê kurdî pêro cinîyê xoverdayoxî sey ganîmetê şerî dîyenê. Îşkenceyê vera cenazaya Gokçe zî wina yo û no îşkence sûcê merdimîye yo. Dişmenîya cinîyan pê destê îqtîdarî yena normalîzekerdene. Ganî ma paştdayîşê cinîyan pîl bikerê.''