Beyannameyê konferansê YPJ’yî  yê  2’ine  ame eşkerakerdene. Beyanname de ca dîya nînan:

 “Ma konferasa dîyine tarîxê 1-2 Hezîrane de bi slogana ‘Ma bi ruhê Leyla û bi hêrsê Avestayan xo newe ra awan bikerê û îşxalkarîye bin bikerê’ viraşte. Sere de şehîd Bêrîvane, Jînda, Hebûn Enterîye, Destane, şehîdê Qereçoxî û bi seyan hemrayê ma yê ke çar parçeyanê Kurdistan, Rojakewtena Mîyanêne û dinya ra beşdarê refanê şorişî bîyê û restî şehadetî, ma na konferan a ke seba vîrardişê înan viraşta, şarê Vakurê Rojakewtena Sûrîye û temamê cinîyan rê pîroz kenê. Seba qerar, soz û hêz o ke ma na konferase ra girewtê pratîk bikerê, ma do nika ra tepîya têkoşînê xo xorîn û xurtir bikerê.”

Ma vera dişmenê merdimîye şer kerd

Vera çeteyanê DAÎŞ’î yê ke seba heme merdimîye û cinîyan bibî çimeyê tersî, zulmî û kiştişî YPJ’yî bi ruhê welatperwerîye, bi vinetişê fedakarîye şer kerd û bedelê giranî dayî. Vera heme şertanê zor û zehmetan yê nê şerê YPJ’yî, Yewîyê Pawitişî yê Şarî YPG-QSD’yî gamek pey de nêeşte, bi hêz û moralî bi wayîrê destkewtîyanê girdan. Ma YPJ, senî ke xelisnayîş û çinkerdişê DAÎŞ’î de rolê serkêşîye girewt, konferase de qerar da ke YPJ, afernayîşê cimatê Azad, demokratîk û têduştî de zî rolêk bigêro.

Têkoşînê YPJ’yî yewîya ruhî ya cinîyan daye awankerdene

Temamê dinya şahîdê têkoşîn û şerê YPJ’yî yê vera çeteyanê DAÎŞ’î bi. No têkoşîno gird wextî reyde temamê cinîyan rê bi çimeyê îlhamî. Roja destpêke ra heta roja ewroyî, her çar hetanê dinya ra, Îvana ra heta Hêlînan tewrê mîyanê refê YPJ’yî bîyî. Nê têkoşînî yewîya ruhî ya cinîyan daye awankerdene û bi dewaya hempara heme cinîyan. Awankerdişê YPJ’yî, bi çimeyê bawerîye, seba xo bi xo pawitişî û bi heyfê heme cinîyanê ke bi destê DAÎŞ’î ameyê qetilkerdene, xelisnayîş û girewtişî.

Ma xo seba pawitişê heme cinî, şar û domanan berpirsîyar vînenê

Seba pawitişê nê rûmetan, ma konferansa xo de reyêka bîne îşaret bi wezîfeyanê pawitişê xoserî kerd û qerardarîya xo ya na babete ser o munaqeşe kerd û ercnaye. Seba ma pawitişê heme cinîyan awe û nanî ra muhîmtir ameye dîyayene. Ma YPJ xo seba pawitişê heme cinî, şar û doman de berpirsîyar vînenê. Seba ke hîna Rojakewtena Mîyanêne û dinya de vera cinî, doman û neteweyan xeterê girdî dewam kenê. Ma YPJ, seba ke ma xo wareyê pisporîya eskerîye de bihêz bikerê, xo biresnê şerwanêko rast ciwîyeno, rast şer keno û xo paweno, ma xo wareyê fikr û eskerîye de do xurtir bikerê. Na hişmendîye ser o ma xo newe ra awan bikerê û xo biresnê kesîyêka profesyonal a ke goreyê şerê nê serdemî têkoşîn kena. Peynî ye de ma bi wesîleya ameyîşê roşanê Remazanî, roşanê Remazanê temamê cimatê Îslamî yê demokratîkî û cinîyan pîroz kenê. Ma hêvî kenê no roşan beno wesîleya cuya arame, aşitîye û têduştîya şaran.”