Grevê vêşanîye yê ESPyî vera surgunkerdişê zîndananê sey bîran dewam keno. Zîndanê Asayîşê Berzî yê Tîpê S û Yyî bîyî merkezê tecrîdî ke nê sey ‘bîran’ ameyê awankerdene. Hetkara Hemsereka Pêroyî ya Partîya Bindestan a Sosyalîste (ESP) û Avûkate Sezîne Uçar derheqê babete de ajansê ma rê qisey kerd.

Sezîne pare kerd ke dewlete bi nê zîndanan kena ke tecrîd û îzolasyonî mîyanê pêro zîndanan de vila bikera. Sezîne vat: ‘’Awanîya zîndananê Tîpê S û Yyî sey bîran ê, nînan de tecrîdêko giran est o. Tepişteyî di saetan ra zafêr nêeşkenê hewa bigêrê, hucreyê yewkesî û hîrêkesî de manenê, pancerayî berz de yê. Coka nînan rê vanê zîndanê sey bîran.

Her qatê zîndanî de kesê ke dewayanê cîya-cîyayan ra yenê muhakemekerdene, manenê. Heman bîna de tepişteyê sîyasî zî estê tepişteyê endamê DAÎŞî zî. Zîndananê sey bîran de armanc tedakerdişê komelî yo. Ganî ma vera nê kerdişan bêveng nêmanê.’’

Sezîne peynîya qiseykerdişê xo de îfade kerd ke endamê înan grevê vêşanîye rê dewam kenê. Sezîne vat: ‘’Ma embazanê xo teyna meverdê. Ganî paştî bêra dayene grevê vêşanîye. Ganî pêro partîyî, çepgîrî û dezgehê şorişgêrî bala xo bidê ney ser.’’