Çarçewaya vengdayîşê Rayber Apoyî yê 27ê sibate de Amed de serkêşîya partîyanê Kurdîstanî, rêxistinanê komelê sîvîlî, rîsipîyan, temsîlkaranê bawerî û dezgehanê demokratîkan û  wekîlan de 'Înîsîyatîfê Yewbîyayîşî' ame ronayene

Merkezê Kongre yê Çand amedî ke tede eşkerayîye ameye dayene de bi kurmanckî, kirmanckî, tirkî, erebkî, sûryanîkî û ermenîkî pankartê ''Ma do bi yewbîyayî ser bikewê''' ame daliqnayene.

Orhan Ayazî ke derheqê ronayîşê înîsîyatîfî de qisey kerd, bale ante prosesê badê vengdayîşê Rayber Apoyî ser û wina vat: ''Gerek paştî bidîyo nê prosesî. Wa no prosesê bibo wesîleya haştîye, azadîye. Semedê ronayîşê yewîye ma 9 mengî xebetî kerdî. Seke yeno zanayene çimê Kurdîstan û dinya kombîyayîşê ma de yo. Ma zî nê kombîyayîşî de çîyanê rindan vejê werte.''

Vengdayîşê 27ê sibate wa bêro caardene

Badê vîjnayîşê dîwanî û rêzgirewtişî kombîyayîşî dest pêkerd. Wekîla DEM Partî ya Mêrdînî Salîha Aydenîz bi nameyê dîwanî qisey kerd. Aydenîze  vat: ''27ê sibate de vengdayîşêk ame kerdene. Seba ke no vengdayîş bêro caardene Rojawan de konferansêk ame kerdene. Ma hêvî kenê ke nê bibê wesîleya yewbîyayîşî. No proses zaf muhîm o. Coka gerek ma zî yewbîyayîşê  xo bîyarê ca. Ma pîya berpirsîyarîya xo bîyarê ca.''

Kongreya PKKyî şarê ma rê xeyrên bo

Wekîlê DEM Partî yê Wanî Sînan Çîftyurek zî bi nameyê însîyatîfî nê vatî: ''Ma wazenê ke wa her kes wayîrê nê Înîsîyatîfê Yewbîyayîşî bivejîyo. Ma bajar bi bajar gêrayî, kurdan ê welatperweran de pêvînayîş kerdî. Ma kombîyayîşê xo de semedê nê yewbîyayîşî  musade waşte. Dima ra ma qerarê ronayîşê sekreterya girewt. Ma Wan û Amed û metropolan de xebete rayra berde. Dima ra deleasyon na ro.

PKKyî badê vengdayîşê Birêz Ocalanî kongreya xo kerde. Şarê ma rê xeyrên bo. Dewlete gerek hinî semedê çareserkerdişê meseleya kurdan game bierzo. Ma sey Înîsîyatîfê Yewbîyayîşî  bixebitê ke wa Komelo Demokratîk û haştîya bianor berê caardene.''

Badê qiseykerdişan kombîyayîş çapemenîye rê qefilnaye dewam kerd.Înîsîyatîfê Yewbîyayîşî siba do deklarasyonê xo eşkera bikero.