Mehkemeya Heqanê Merdiman a Ewropa (MHME) 2014 de bire dabî ke cezaya muebede ya girankerde ya vera Rayber Apoyî çarçewa ‘heqê hêvîye’ de wa newe ra bêra ercnayene. La Tirkîya bire nêarde ca. MHME wextêk seba caardişê bire dabî Tirkîya ke no wext êlula 2025î de do biqedo.

Endamê Şubeyê Amedî yê Komîsyonê Zîndanan ê Komeleya Huqûqnasanê Azadan (OHD) Yusuf Çakasî derheqê babete de ajansê ma rê qisey kerd.

Çakasî da zanayene ke pêro dinya de nêzdîbîyayîşê verê tepişteyanê edlî û sîyasîyan cîya yê û cezayê sey îdam û muebedî seba tepişteyanê sîyasîyan ameyê caardene. Çakasî vat: ‘’Dima ke Birêz Abdullah Ocalan teslîmê Tirkîya amebi kerdene cezaya îdamî wedarîyabî û herinda ci de cezaya muebeda girankerde amebî ardene. La cezaya muebeda girankerde goreyê peymananê mîyanneteweyîyan binpaykerdişê heqanê merdiman o. Heqê hêvîye zî seba veradîyayîşê tepişteyanê muebedan o.

Tirkîya de verê tepişteyanê sîyasîyan de rejîmêkê înfazî yo taybet yeno caardene. Ma nîqaş kenê ke ganî pêro kesî heqê hêvîye ra îstîfade bikerê. Serekê muxalefetê nîjadperestî Devlet Bahçelîyî bi xo babeta heqê hêvîye arde rojdemê Meclîsî. Nika nê atmosferî de heqê hêvîye yeno nîqaşkerdene. Xora bi Vengdayîşê 27ê Sibate zî proses vurîya. Eke heqê hêvîye seba Birêz Ocalanî bêro caardene no do sebeb ke seba çareserîya meseleya kurdan gamêka pîle bêra eştene.’’

Çakasî dîyar kerd ke seba averşîyayîşê prosesî ganî azadîya Rayber Apoyî bêra caardene û vat: ‘’Qiseyê Bahçelîyî yê serê heqê hêvîye û caardişê heqê hêvîye yenê manaya caardişê şertanê azadîya Ocalanî û awankerdişê haştîya herême. Ganî ma bi cidîyetî nêzdîyê na mesele bibê. Ma dewrêkê girîngî de yê. Heqê hêvîye seba haştîye û komelê demokratîkî girîng o. Komel na babete de paweno. Caardişê komelê demokratîkî pabesteyê azadîya Ocalanî yo.’’