Eyaletê Bayernî yê Almanya de kurdan û dostanê înan bi têkoşînê huqûqî serkewtişêko pîl vist destî. Verî kurdê bi nameyê Kemal Goktepeyî rê seba alaya YPJyî kiriştêne bi waştişê cezaya pereyî dewa amebî akerdene. Roniştişê dewa de mehkeme birêka girînge daye.

Bayern de pêşnîyazê 2ê adara 2017î ra dima 13ê hezîrana 2019î de alayê YPG-YPJyî ameybî qedexekerdene. 

Vizêr roniştişê dewaya Goktepeyî de heyetê mehkeme pêro îdîaya Serdozgerîya Munihî red kerdî û bire daye ke kiriştişê alayaYPG-YPJyî sûc nîyo. Heyetê mehkeme da zanayene ke YPG-YPJ pabesteyê PKKyî nîyê û nê alayî paştdayîşê seba Sûrîye mojnenê.

Mehkeme eşkera kerd ke pêşnîyazê 2ê adare yê Wezaretê Karanê Zereyî qanûnêk nîyo.

3 serran ra nata Eyaletê Bayernî de kurd û dostê înan yenê krîmînalîzekerdene. Polîsî keyeyanê kesanê ke alaya YPJ-YPGyî kirişnenê yan zî medyaya dîjîtale de pare kenê ser erzenê.