Cenevre de çalakîya roniştişî: Muxatabê şima şarê Sûrîye yê

Bajarê Cenevre yê Swîsre de verê Ofîsê Neteweyê Yewbîyayeyî de semedê balantişê serê grevê vêşanîye yo ke vera tecrîdî yeno kerdene, çalakîya roniştişî ameye destpêkerdene.

Çarçewa hemleya  'Tecrîd, Faşîzm û Îşxalî rê Bes o, Wext Wextê Azadîye yo' de bajarê Cenevre yê Swîsre de verê Ofîsê Neteweyê Yewbîyayeyî (NY) de balantişê serê grevê vêşanîye yo ke vera tecrîdî yeno kerdene, çalakîya roniştişî ameye destpêkerdene. Çalakîye raştê kombîyayîşê Komîteya Qanûnê Bingeyî ameye. Çalakîye de ame waştene ke wa şarê Sûrîye sey muxatabî bêro girewtene.

Çalakîye bi rêzgirewtişî ameye destpêkerdene. Hemserekê CDKyî Salîh Saglamî ard ziwan ke înan heme semedê balantişê serê grevê vêşanîye hem zî semedê şermezarkerdişê pêvînayîşanê NYyî yê derheqê Sûrîye de ke bê kurdan yenê kerdene çalakîya oraganîze kerde û veng da heme hetanê dekmorasîyî ke wa paştî bidê grevê vêşanîye.

Temsîlkarê Îdareyê Xoserî yê Rojawanî Hîkmet Îbrahîmî zî ard ziwan ke  pêvînayîşanê pêvînayîşanê NYyî de sere de şarê kurdî şarê herême çîn hesibyeno û vat: ''Nê pêvînayîşan de şaranê Sûrîye ra çew çîn o. Yeno waştene ke wa herême çeteyan rê bero teslîmkerdene ke pê destê Rûsya û Tirkîya yenê paştdayene. Muxatabo esas NYyî şarê Sûrîye yo.''

Hemserekê CDKyî yê Swîsre Alî Şîmşekî vat: ''Seba ke Şorişê Rojawanî bi paragdîgmaya Ocalanî ame kerdene tecrîdê Îmrali ame xorîkerdene. 2 mengî tepişteyê sîyasîyî vera tecrîdî grevê vêşanîye de yê. Ma sey kurdîstanijan heta ke waştişê tepişteyan heqdarî bêrê caardene, Rayberîya ma û Kurdîstan bibê azad xoverdayîşê xo rê do dewam bikerê.''

Çalakîya roniştişî ya verê Neteweyê Yewbîyayeyî do hewte de hîrê rey bêro kerdene.