PKKyî Kongreya 12ine de eşkera kerd ke Alî Haydar Kaytan 2018 de şehîd bîyo. Ma 6ê kanûna 2017î de Endamê Konseya Rayberdişî ya KCKyî Alî Haydar Kaytanî reyde roportajêk kerdibi.

Ma beşê diyînî yê nê roportajî ancî danê. Kaytanî nê roportajî de qalê Dêrsimî û Apoyîyanê Dêrsimî kerdibi. Qismê roportajî ra tayê noqtayê girîngî wina yê:

‘’1973 Dêrsim de tewrbîyayîşan dest pêkerdibi. Wexto ke ma bire daye ke abigêrê Kurdîstanî Dêrsim de yew koma ma est bîye. Endamê kome yê verênî wextê tehtîlî seba ke ciwanan qezenç bikerê xebitîyayêne. Dêrsim de hema destpêkî ra ciwanan eleqe mojnabi Apoyîyan. 

Xora o çax şarê Dêrsimî bi zorî amebi koçkerdene. Nufusê ci kêm bi. La Dêrsim de welatperwerîye xurt bîye. 

Dêrsim de rixmê çepgîrîye zî Kemalîzm xurt bibi. Ney de tesîrê polîtîkayanê înkar û îmha est bi la kêmasîya çepgîran zî est bîye. La dewan de rewşe cîya bibî. Xora Rayber Apoyî wexto ke şibi Dêrsimî vatibi ke ‘Ganî kulturê şarî yê tîyayî bêro pawitene.’

Dêrsim de terteleyî ra semed şar de ters est bi. La ancî zî şarê Dêrsimî vera zulmî hetê xoverdayîşî de bi.

Dêrsim de hêverî cinîyê ciwanî Apoyîyan de eleqedar bîyî. Sakîne Cansiz mîsala ney a. Dêrsim de Apoyîyê verênî Azîme Demîrtaş, Metîn Turgut, Huseyîn Eroglu, Murat Yuksel, Celal Aşkin, Îbrahîm Kaplan, Hasan û Yusuf Kul, Cahît Dayan, Aytekîn Tugluk, Haydar Alpaslan, Kazim Demîrtaş û Musa Kazim Aydin bîyî.

Alî Dogan Yildirim şehîdê Dêrsimî yo verên bi. O Anqara, Tuzluçayirî ra tewrê ma bibi. Embaz Alî netîceya qezayêkî de şehîd bibi. Ez, Kesîre û embaz Duran ma şîyî cenazaya ey. Şar zî tewrê cenaza bibi. Mi cenaza de qisey kerd. Mi tirkî qisey kerdibi la sloganê ma bi temamî kirmanckî bîyî.

1976 de ma hinî agêrayêne Kurdîstanî. Serra 1977î serrêka girînge bîye. Çunke o çax wextê têkoşînê polîtîk bibi. A serre 1ê Gulane de xeylê merdimî zî ameybî qetilkerdene. O çax ma Dîlok de kombîyayîşêk kerdibi. Embaz Hakî Karer dima Dîlok de şehîd bi. 

Embaz Aydin Gul Dêrsim de lîse de wendekar bi. O zî 8ê adara 1977î de amebi qetilkerdene. O zî şehîdê Dêrsimî yo diyîn bi. O çax ez Anqara ra ameyêne Dêrsimî. Ez û Kemal Pîr ma tewrê cenazaya Aydinî bîyî. 

1976 de Anqara de Dîkmenevî de ma tayê embazî keyeyêk de ameybî pêser. Rayber Apoyî qewimîyayîşê Kurdîstanî ercnayêne. Bira Seferê Kurdîstanî hetê Rayber Apoyî ra nê kombîyayîşî de ameye dayene. Dima ma verê xo da Kurdîstanî. 

Kongreya Fîsî ra ver 1978 de Xarpêt de ma kombîyayîşêk kerd. Uca de embaz Mazlûm Doganî vatibi ke ganî ma bibê partîye û nameyê partîye bibo ‘Yewîya Têkoşînî ya Seba Felata Kurdîstanî.’ 

1978 de Fîsê Licê de kongreya ronîyayîşî ameye kerdene. Dêrsimî ra ma di kesî tewrê kongre bîyî. Embaz Seyfettîn Zogurluyo ke Dêrsimî ra mi o şinasnayêne û embaz Duran Kalkanî meymandarîye kerdêne. Ma qasê 23 delegeyî bîyî. Tîya de PKK ronîya.

PKK seba kurdan partîyêka sey ê bînan nêbîye. PKKyî ra nêbîyêne şarê kurdî do qetî şerê estbîyayîşî de ser nêkewtêne. PKK û KCK yewbînan ra cîya nîyê, ê yewbînî yê.’’