Gerîlayê HPGyî Abdullah Osmanoglu (Agir Stêrk) o ke 17ê kanûna 2018î de gerîlayê HPGyî Rênas Benek (Mehmet Axîn) reyde Herêmanê Pawitişî yê Medya de hêrişê hewayî de şehîd bibi paytextê Swêdî yê Stockholmî de ame yadkerdene.

Merasîmê yadkerdişî Merkezê Komelê Demokratîkî yê Kurdan ê Stockholmî de bi deqayêkê rêzgirewtişî dest pêkerd. Sîyasetmedarê kurdî Rizgar Dêrsimî vist vîrî ke Osmanoglu ciwanêk bi ke Ewropa de pîl bi, kar û dibistane de serekewte bi û dima ke Têgêrayîşê Azadîye nas kerd serra 2017î de bi hawayêkê profesyonelî tewrê karî bi. Dêrsimî ard ziwan ke Osmanoglu wextêk Swêd de bi fedakarîye xebate kerde, rayberîya rêxistinkerdişê çalakîyan û nawnayîşan kerde û seba ke dewleta tirke ra hesab biperso şi koyanê Kurdîstanî û tewrê gerîlayan bi. Kurdîstanijanê ke o nas kerdêne derheqê Osmanogluyî de vînayîşê xo panoyêk ser o nuştî.Kombîyayîş de derheqê Osmanogluyî de sînêvîzyonêk ame mojnayene û sloganê ''Şehîdî Nêmirenî'' ame vatene.