Endama Têgêrayîşê Azadîye yê Kurdan Hêlîne Umît Medya Haber TV de rojdem ercna. 

Qiseykerdişê Hêlîne Umît ra tayê noqtayê girîngî wina yê:

‘’Kongreya 12ine ya PKKyî birê girîngî ameyî girewtene ke ganî ney hol bêrê famkerdene. Qerardarîya vurîyayîş û vurnayîşî pîl a. Tayê vanê ke PKK bin kewto. Wina nîyo. PKKyî 52 serran têkoşîn kerd û kurdî kerdî kerdoxê esasî. PKKyî seba ke berê sîyasetê demokratîkî abikero bira feshkerdişî girewte. 

Vengdayîşê Devlet Bahçelîyî ra dima Rayber Apoyî de pêvînayîş ame kerdene. Rayber Apoyî zî Vengdayîşê Haştîye û Komelê Demokratîkî kerd. Naye ser o ma bi lezî gamî eştî, kongre arê dayî, birî girewtî. Ganî naye ra pey dewlete zî vurîyayîş û vurnayîşî bikera. Dewlete xo bivurna, eke wina nêbo birê kongre do nêkewê dewre. Eke sîyasetê demokratîkî rê war nêro akerdene ma do ney senî bikerê? Eke sereraştkerdişê qanûnî bêrê kerdene ma do têbigêrê. Ma azadîya Rayber Apoyî waşte. Ganî dewlete heqê hêvîye bîyara ca. 

Hetê dewlete û îqtîdarî tena qisey kenê. Qalê wayûbiratîya kurd û tirkan kenê. Eke wina yo ganî bi Qanûnê Bingeyî heqê kurdan bêrê dayene. Meclîs de ganî seba çareserîya meseleya kurdan gamî bierzîyê. Hetê bînî ra ma wina fam kenê ke mîyanê AKPyî de tayê hetê ke rantgîr ê wazenê ke şer dewam bikero. 

Hema zî bi qiseyê ‘terorî’ qalê PKKyî yeno kerdene. Ganî dewlete qiseyê ‘Tirkîyaya bêterore’ ra fek vera bida. PKKyî bîlasebeb dest nêeşt çeke. Wa dewlete wextê vîyarteyî de têrî biba. 

Ma kongre de bire daye ke çekan war verdê. La artêşa tirke hema zî hêrişanê xo rê dewam kena. No zî hetêkî ra mojneno ke îqtîdar şer de israr keno. 

Mîyanê şarî de qesawet est o. Ma şarê xo fam kenê. Wa şarê ma nêvajo ke PKK bi zorî çekan war verdeno. Şarê ma naye zî bizano ke PKK do qebul nêkero ke çekan war biverdo, debikewo zîndanî. 

Kadroyanê ma, şarê ma û têgêrayîşê ma bi xo tim vat ke seba prosesê neweyî ganî azadîya Rayber Apoyî bêra caardene, Meclîs de komîsyon bêro awankerdene û sereraştkerdişê qanûnî wa bêrê kerdene. Seba çareserîye Qanûno Bingeyî yo newe û peymana komelkîye şert ê. 

Ma operasyonanê vera CHPyî şermezar kenê. Tayê vanê ke DEM Partî û AKPyî pêkerdo ke CHPyî çin bikerê. Eqsê ci tewirê kurdan vera pêro tedayan eynî yo. Xora ma CHPyî rexne kenê; ganî CHP nê prosesî de seba çareserîye hîna aktîf bibo. 

Derdê ma awankerdişê komelê demokratîkî yo ke ganî pêro partîye seba ney mesuldarîye bigêrê xo ser. Meseleya kurdan meseleya tirkîya ya. 

Tirkîya de medya xoser nîya. Nê prosesî de ziwanê medya hema zî ziwanê haştîye nîyo. Ganî medyaya Tirkîya ziwanê şerî ra fek vera bida. Qiseyê ‘terorî’ şarê ma şeqizneno. Ganî medya verê erjanê şarê ma de hesas biba.

Rayber Apoyî vengdayîşêko tarîxî û paradîgmayêka tarîxî nayî werte. Ganî her kes paştî bido na paradîgma. Rayber Apoyî bi kedêka pîle û amadekarîyanê xorinan ê 52 serran  rayraşîyayîşêko qerardar û tarîxî da destpêkerdene. Yanî ma newe dest pêkerd.’’